Bas Pustaka si Badia enggo ikataken kai saja pagi si terjadi, janah uga sipat-sipat manusia bas “wari-wari pendungi.” Enda banci nampati kita ngangkai maka kedungen jaman enda enggo ndeher.​—2 Timotius 3:1; Matius 24:3; Daniel 8:19.

 Enggo ikataken bas Pustaka kai saja “tanda” wari-wari pendungi, janah si e kerina radu terjadi. (Lukas 21:7) Contohna:

 I japa pe lit perang. Enggo ikataken Jesus maka “bangsa ngelawan bangsa pagi, kerajan ngelawan kerajan.” (Matius 24:7) Selain si e ikataken bas Ketangkasen 6:4, lit sekalak si nangkih kuda si ngertiken peperangen, “buatna perdamen bas doni enda.”

 Kurang pangan. Ikataken Jesus maka terjadi pagi “kurang pangan.” (Matius 24:7) Bas buku Ketangkasen pe ikataken lit si deban si nangkih kuda si maba timbangen, si ngertiken kurang pangan bas melala ingan.​—Ketangkasen 6:5, 6.

 Gempa si megegeh. Enggo ikataken Jesus maka ‘i japa pe terjadi pagi gempa.’ (Matius 24:7; Lukas 21:11) Gempa si megegeh terjadi i sebelang doni si erban kalak jadi susah janah lit ka si mate. Enda lebihen asangken si enggo-enggona.

 Penakit. Enggo ikataken Jesus maka i japa pe lit wabah penakit si erban enterem kalak mate.​—Lukas 21:11.

 Kejahaten. Mbarenda nari enggom lit kejahaten, tapi ikataken Jesus maka bas wari-wari pendungi “reh buena kejahaten.”​—Matius 24:12.

 Doni icedai. Bas Ketangkasen 11:18 enggo ikataken maka manusia “ncedai doni” pagi. Mbue si la mehuli si ilakoken manusia si erban doni enda jadi ceda.

 Sipat kalak reh jahatna. Bas 2 Timotius 3:1-4, enggo ikataken Pustaka maka bas wari-wari pendungi, teremen kalak “la meteh ngata bujur, la setia, . . . la nggit arih-arih, tukang pitnah, la kuasaina dirina, kasar, la tena ngena si mehuli, penghianat, keras kepala, sombong.” Perban sipat-sipat kalak reh jahatna, cocok kel jamanta enda ikataken jaman “si sulit janah bahaya.”

 Keluarga la ersada. Bas 2 Timotius 3:2, 3, enggo ikataken Pustaka maka enterem kalak “la lit kekelengenna” man keluargana, janah anak-anak “la patuh man orang tua.”

 La diate kalak Dibata. Ikataken Jesus bas wari-wari pendungi “enterem kalak reh kurangna kekelengenna.” (Matius 24:12) Maksud Jesus, kekelengen kalak man Dibata reh kurangna. Bas buku 2 Timotius 3:4 pe ikataken maka bas wari-wari pendungi enterem kalak “lanai diatena Dibata tapi kesenangenna saja si daramina.”

 Enterem kalak si munapik. Bas 2 Timotius 3:5 ikataken Pustaka maka enterem kalak tempa-tempa sembahna Dibata tapi situhuna labo idalanken kalak e kai si ngena ate Dibata.

 Reh jelasna iangkai isi Pustaka. Bas buku Daniel ikataken maka bas pendungi jaman enda enterem kalak reh jelasna iangkaina kebenaren si lit bas Pustaka, termasuk kerna tanda pendungi jaman enda.​—Daniel 12:4.

 Pendahin erberita ilakoken i sebelang doni. Nina Jesus: “Berita si meriah kerna Kerajan e iberitaken pagi man manusia i belang-belang doni.”​—Matius 24:14.

 Enterem kalak la ermediate ras nggit nokohi. Ikataken Jesus maka teremen kalak la diatena bukti-bukti si jelas kerna kedungen jaman enda. (Matius 24:37-39) Selain si e, bas 2 Petrus 3:3, 4 banci siteh enterem kalak sitik pe la diatena kedungen jaman enda janah katakenna maka mbarenda nari pe bagenda nge keadan doni enda.

 Kerina si enggo ikataken Pustaka terjadi. Enggo ikataken Jesus maka bas wari-wari pendungi kerina tanda kedungen jaman enda enggo terjadi i japa pe.​—Matius 24:33.

 Tuhu. Kai si terjadi bas doni enda bage pe perhitungen waktu bas Pustaka mbuktiken maka wari-wari pendungi imulai bas tahun 1914, sanga Perang Doni I imulai. Keadan doni si gundari enda mbuktiken maka kita nggeluh bas wari-wari pendungi. Guna metehsa banci tontonndu video enda:

 Bas tahun 1914, Kerajan Dibata mulai merentah surga nari. Salah sada si tangtangna ilakoken Kerajan e eme mpelawes Setan si Iblis ras pengikutna arah surga nari ku doni. (Ketangkasen 12:7-12) Mbelin kel pengaruh Setan man manusia. Enda teridah arah sipat ras perbahanen kalak si reh jahatna. Perban reh jahatna sipat ras perbahanen kalak, jamanta enda dungna jadi “sulit janah bahaya.”​—2 Timotius 3:1.

 Enterem kalak stres perban serana situasi si gundari. Lit si kuatir ntah lanai bo pagi manusia banci nggeluh alu dame. Enterem ka si mbiar dungna pagi manusia ncilakai sada ras si debanna.

 Tapi enterem kalak lit arapenna kerna masa depan si terulin. Situhuna, kalak e pe kuatir nge, tapi tek kalak e maka lanai ndekah imasapken Kerajan Dibata kerina masalah bas doni enda. (Daniel 2:44; Ketangkasen 21:3, 4) Sabar kalak e nimai Dibata erban kerina janjiNa terjadi. Selain si e, terpegegehi kel kalak e perban kata-kata Jesus enda: “Kalak si megenggeng seh ku kedungenna iselamatken pagi.”​—Matius 24:13; Miha 7:7.