Piga-piga terjemahen Pustaka bas bahasa Karo nggunaken kata “neraka” ntah pe “naraka” bas piga-piga ayat. (Matius 5:29; Lukas 12:5, Pustaka si Badia ras Ende-enden Edisi ke-4 © LAI 2003) Enterem kalak ngatakenca neraka e ingan kalak jahat ihukum ras isiksa seh rasa lalap bas api si gurlah. Bali bagi gambar si idahndu bas artikel enda. Tapi bage kin si iajarken bas Pustaka?

Si ibahas bas artikel enda

•  Tuhu kin neraka e ingan kalak isiksa seh rasa lalap?

•  Uga kerna perumpaman Jesus si nceritaken kerna kalak bayak ras Lasarus?

•  Tuhu kin neraka e maksudna keadan si terpisah arah Dibata?

•  Lit kin kalak si pernah ndarat arah neraka nari?

•  Ayat-ayat Pustaka kerna neraka ntah pe Kuburen

•  Kata Heber ras Junani bas Pustaka si Badia

•  Sejarah ajaren api neraka

 Lang. Istilah “neraka” si ipake bas piga-piga Pustaka iterjemahken arah kata Heber “Syeol” ras Junani “Hades.” Kata e pe mon-mon iterjemahken jadi “doni kalak mate.” Tapi situhuna, “Syeol” ras “Hades” maksudna “Kuburen” ntah pe ingan kalak mate. Pustaka ngataken maka kalak si lit bas Kuburen lanai tehna kai pe.

•   Kalak mate la tehna kai pe janah lanai gejapna mesui. “Lanai bo lit dahin, ntah pe perukuren. I bas doni kematen lanai bo lit pemeteh ntah pe kepentaren.” (Pengerana 9:10, Pustaka si Badia ras Ende-enden Edisi ke-4 © LAI 2003) Kalak mate pe lanai gejapna mesui ntah pe ndehereng ia perban mesui kapna. Nina Pustaka, “Bahanlah maka juru me kalak jahat alu lanai ngerana lawes ia kubas doni kematen.”​—Masmur 31:18, Pustaka si Badia ras Ende-enden Edisi ke-4 © LAI 2003; Masmur 115:17.

•   Enggo itetapken Dibata maka hukumen dosa eme kematen, labo isiksa seh rasa lalap bas neraka. Ikataken Dibata man Adam, manusia si pertama, maka adi ilanggar Adam undang-undangNa mate me ia. (Kejadin 2:17) Sitik pe la lit ikataken Dibata kerna isiksa seh rasa lalap bas api neraka. Kenca erdosa Adam, ikataken Dibata man bana, “Perban kam arah taneh, mulihken ka pagi kam ku taneh.” (Kejadin 3:19) Maksudna, mate pagi Adam. E me hukumenna. Adi ihukum Dibata ateNa Adam bas neraka, pasti katakenNa paksa si e. Hukumen si enggo itetapken Dibata la pernah berubah. Ratusen tahun kenca Adam erdosa, nina Pustaka, “Upah dosa eme kematen.” (Roma 6:23) Kalak si enggo mate, lanai perlu ihukum perban “adi sekalak jelma enggo mate, ia enggo ibebasken arah dosana.”​—Roma 6:7.

•   La pernah turah bas ukur Dibata guna ngukum kalak jahat bas api neraka. (Jeremia 32:35) La mungkin isiksa Dibata manusia perban enggo iajarken bas Pustaka “Dibata e kekelengen.” (1 Johanes 4:8) Selain si e, ate Dibata sisembah min Ia perban keleng ateta Ia, labo perban mbiar kita isiksa seh rasa lalap.​—Matius 22:36-38.

•   Kalak bujur pe ku neraka nge. Bas piga-piga terjemahen Pustaka, lit ayat-ayat si ngataken maka kalak bujur bagi Jakup ras Jop lawes atena ku “neraka.” (Kejadin 37:35; Jop 14:13) Lit ka terjemahen si ngataken maka Jesus Kristus pe bas neraka sope ia ipekeke. (Perbahanen Rasul-Rasul 2:27, 31, 32, King James Version a) Emaka kata “neraka” bas kerina terjemahen Pustaka e pasti maksudna Kuburen. b

 Perumpaman enda iceritaken Jesus ras icatat bas Lukas 16:19-31. Perumpaman eme gambaren si nampati kita meteh pelajaren si banci sidat arah sada kisah, janah nampati kita ngangkai cara rukur Dibata kerna sada hal. Emaka, perumpaman kerna kalak bayak ras Lasarus labo kisah nyata. (Matius 13:34) Adi tehndu atendu terbuen kerna perumpaman enda, banci bacandu artikel “Ise kin Kalak Bayak ras Lasarus e?”

 Lang. Menurut Pustaka, kalak mate la tehna kai pe janah la ia sadar. Emaka ajaren si ngataken maka kalak mate tehna ia terpisah arah Dibata, la sesuai ras ajaren Pustaka.​—Masmur 146:3, 4; Pengerana 9:5.

 Lit. Bas Pustaka lit icatat siwah kalak si pernah masuk ku Kuburen (iterjemahken “neraka” bas piga-piga Pustaka) tapi dungna ipekeke janah nggeluh mulihi. c Adi tuhu-tuhu kin kalak e isiksa bas api neraka, pasti iceritaken kalak e kenca ipekeke. Tapi arah si siwah kalak ndai, la lit si cerita maka kalak e isiksa ntah pe ceritakenna kai si inanamina sanga ia mate. Engkai? Perban bagi si ikataken bas Pustaka, kenca sekalak jelma mate labo tehna kai pe. Kalak e bali bagi kalak si entabeh kapna “medem.”​—Johanes 11:11-14; 1 Korinti 15:3-6.