Adi kuatirsa kam, banci dungna kam sakit janah emosindu pe banci lanai stabil. Selain si e, banci ka terjadi masalah si terbelinen asangken si kuatirkenndu e.

•  Ula mbuesa tontonndu, bacandu, ntah pe begikenndu berita si la mehuli. Adi lit si la mehuli si terjadi, labo perlu tehndu kerina ceritana. Adi mbuesa tontonndu, bacandu, ntah pe begikenndu berita si la mehuli, banci erban kam mbiar janah putus asa kam dungna.

   Pedah Pustaka: “Ukur si serbut erban bene semangat.”​—Kuan-kuanen 17:22.

   “Adi lit berita si terbaru si erban guntar sada kuta, merhat kel kita meteh terbuen kerna berita e. Tapi e la mehuli. Emaka gundari lanai rusursa kudaram-darami berita, dungna enggo reh tenangna kuakap.”​—John.

   Ukurilah: Rusur nge daramindu berita si terbaru?

•  Banlah jadwalndu alu ratur. Usahakenlah gelah seri lalap tiap wari waktundu guna medak, man, ndahiken dahinndu, bage pe guna medem. Adi lit jadwalndu, gejapkenndu me maka geluhndu enggo bagi biasana janah lanai kam kuatirsa.

   Pedah Pustaka: “Rencana kalak rajin pasti berhasil.”​—Kuan-kuanen 21:5.

   “Tangtangna lit penakit COVID-19, lanai kulakoken jadwalku si mbarenda. Dungna enggo buen waktuku nonton, mbegiken musik, ntah pe main game. Emaka, gelah banci kugunaken waktuku alu mehuli, kuban me jadwal kai saja si arus kulakoken tiap wari.”​—Joseph.

   Ukurilah: Lit nge jadwalndu si ratur si erban puas kapndu kenca enggo dung sada wari ntah pe sanga enggo berngi wari?

•  Ukurilah kai si mehuli. Adi terus ukurindu si mbarenda si erban kam erkadiola gundari janah bayangkenndu si la mehuli si banci terjadi perban si e, banci erban kam lebih kuatir. Emaka pangen ukurindu kai saja si erban kam ngata bujur.

   Pedah Pustaka: “Teruslah kataken bujur.”​—Kolose 3:15.

   “Adi kubaca Pustaka, lanai kuukuri berita si la mehuli. Dungna enggo lebih positip aku. Memang rusur nge sibegi kerna si e, tapi enda erguna kel.”​—Lisa.

   Ukurilah: Lalap nge ukurindu kai si la mehuli si terjadi bas geluhndu, janah si mehuli la ingetndu?

•  Ukurilah kalak si deban. Adi sangana kita kuatir pangen siakap sisada. Tapi asangken bage si lakokenndu, pangen ukurindu kai si banci lakokenndu man kalak si deban.

   Pedah Pustaka: “Perdiatekenlah kepentingen kalak labo kepentingenndu saja.”​—Pilipi 2:4.

   “Meriah kuakap nampati kalak si deban. Perban adi kusampati kalak, meriah ukurna. Aku pe lanai kuakap kuatirsa. Adi sibuk aku nampati kalak si deban, lanai kuukuri kai si erban aku kuatir.”​—Maria.

   Ukurilah: Lit nge kalak si tandaindu si perlu ia penampat? Uga carandu nampati kalak e?

•  Jagalah kesehatenndu. Raturlah kam olahraga bage pe medem. Panlah pangan si sehat. Adi jagandu kesehatenndu, banci kam lebih positip janah lanai kam kuatirsa.

   Pedah Pustaka: ‘Latihen gerak badan lit gunana.’​—1 Timotius 4:8.

   “Amin pe aku ras anakku lanai banci olahraga i darat, tapi tetap denga kami banci olahraga i rumah. Emaka meriah nge ukur kami duana, janah kami duana pe reh deherna.”​—Catherine.

   Ukurilah: Sanga ukurindu kerna perpanndu sedekah enda bage pe kerna olahragandu, perlu nge sesuaikenndu gelah kam lebih sehat?

 Selain cara-cara si ikataken ndai, lit ka si enggo nampati enterem kalak gelah lanai kuatirsa. Eme janji-janji bas Pustaka kerna wari si pepagi si luar biasa. Janah ula kam sangsi, janji e pasti terjadi. Nen artikel “Kai Pagi si Ilakoken Kerajan Dibata?”