I sebelang doni, melala kel banjir bandang si sangana terjadi. Perdiateken piga-piga laporen enda:

•   “Meder kel udan bas ibu kota Cina antara wari Sabtu seh wari Rabu, eme seh ngasa 744,8 milimeter. Enda me udan si mederna kel bas 140 tahun enda.”—AP News, 2 Agustus 2023.

•   “Bas wari peduaken Topan Khanun terjadi bas bagin selatan Jepang, eme wari Kamis, lit dua kalak si ilaporken mate. Topan enda erban meder kel udan ras megegeh kel angin. Janah iperkiraken, perban topan e curah hujan si terjadi bas pegunungen Taiwan bagin tengah banci seh 0,6 meter.”—Deutsche Welle, 3 Agustus 2023.

•   “Bas 50 tahun enda, udan si mederna kel si terjadi bas daerah Kanada bagin timur, enggo erban bencana banjir [bas Nova Scotia].”—BBC News, 24 Juli 2023.

 Kai nina Pustaka si Badia kerna bencana-bencana e?

 Ikataken Pustaka maka kita sangana nggeluh bas “wari-wari pendungi” ntah pe akhir jaman. (2 Timotius 3:1) Ikataken Jesus maka bas akhir jaman siidah me “kejadin-kejadin si erban mbiar,” janah enda me si terjadi gundari. (Lukas 21:11) Perban lit perubahen iklim, cuaca ekstrem ras bencana alam jadi reh parahna, reh rusurna terjadi, janah la terprediksi.

 Ikataken Pustaka maka kejadin si erban mbiar si sangana terjadi, situhuna banci erban kita terhibur. Engkai maka bage? Nina Jesus, “Sanga idah kena kerina enda terjadi, arus teh kena maka Kerajan Dibata enggo ndeher.”—Lukas 21:31; Matius 24:3.

 Ertina, kai si sangana terjadi gundari, situhuna ncidahken maka kentisik nari Kerajan Dibata merentah bas doni enda. Kerajan e pagi si erban keadan doni enda jadi reh ulina, termasuk siklus lau.—Jop 36:27, 28; Masmur 107:29.

 Guna meteh terbuen informasi kerna uga pagi Kerajan Dibata mpesikap doni enda, nenlah artikel “Ise nge Pagi si Nelamatken Doni?”