Terpaksa nge kam hemat perban enggo kurang uang masukndu erkiteken krisis ekonomi? Krisis ekonomi banci rempet terjadi perban lit wabah penakit, bencana alam, konflik politik, ras perang. Sanga rempet kurang uang masukndu, banci jadi stres kam. Tapi, lit pedah bas Pustaka kerna kai saja si banci lakokenndu gelah banci kam hemat.

 Pedah Pustaka: “La soal aku . . . kekurangen ntah pe erlebih, kuteh rahasiana gelah banci puas.”​—Pilipi 4:12.

 Amin gia enggo kurang uang masukndu, banci sesuaikenndu bandu ras uang masukndu si gundari. Adi reh terna kam ras keluargandu ngaloken uga keadan kena si gundari janah mulai sesuaiken kena diri kena, reh ulina me keadanna.

 Daramindulah banci ntah lang datndu bantuan arah pemerentah ntah pe organisasi kemanusian. Adi banci datndu, mislah kam ndaftar perban biasana lit batas waktuna.

 Pedah Pustaka: “Rencana gagal adi la icakapken lebe, tapi rencana berhasil adi mbue penasehat.”​—Kuan-kuanen 15:22.

 Cakapkenlah ras teman geluhndu bage pe ras anak-anakndu kerna keadan kena. Adi enggo cakapken kena, banci iteh kerina anggota keluarga perubahen kai saja si perlu iban janah ikut kalak e ngelakokenca. Adi kerina anggota keluarga erusaha gelah hemat, banci gunakenndu senndu alu mehuli.

 Pedah Pustaka: ‘Kundul lebe janah kira biayana.’​—Lukas 14:28.

 Adi enggo kurang uang masukndu, perlu itehndu man kai saja senndu pakendu. Si pertama, tulis sekai kira-kira uang masukndu tiap bulan. Kenca si e, tulis sekai kira-kira uang keluarndu tiap bulan janah man kai saja e. Tulislah kerina amin pe kari arus sesuaikenndu daftar e. Banlah tabungenndu gelah banci kari pakendu adi lit keadan darurat.

 Si Banci Lakokenndu: Kenca pereksandu sekai uang keluarndu, kirandu ka lah uang keluarndu man kai si kurang penting. Adi totalkenndu e, banci saja sengget kam perban melala kepe uang keluarndu. Contohna, kenca pereksa sekalak dilaki uang keluarna, sadar ia kepeken enggo erjuta-juta senna keri tiap tahun guna nukur bon-bon karet saja!

 Pedah Pustaka: ‘Pastiken kai si lebih penting.’​—Pilipi 1:10.

 Bandingken sekai uang masukndu ras sekai uang keluarndu. Kenca si e, tentuken uang keluar si apai si banci kurangindu gelah senna banci pakendu ncukupi keperlunndu si lebih penting. Perdiateken piga-piga contoh enda:

•   Kendaran. Adi lebih kendaranndu sada, banci nge dayakenndu sada? Adi merga kendaranndu, banci nge gantindu ku kendaran si termurahen? Ntah pe, banci nge kam naik kendaran umum ntah sepeda gelah la perlu lit kendaran pribadindu?

•   Hiburen. Banci nge sementara lanai kam langganen TV kabel ntah pe layanen streaming? Ntah, banci nge daramindu hiburen si deban si termurahen?

•   Tagihen Tiap Bulan. Cakapken ras anggota keluargandu uga carana engkurangi uang keluar guna lau, listrik, ras bensin. Amin pe banci saja sepele siakap mateken lampu ras engkurangi lau si ipake, tapi situhuna e banci nampati kita hemat.

•   Pangan. Asangken man darat, pangen kam erdakan i rumah. Tentuken kai saja si atendu tanggerkenndu, kenca si e tukurlah bahan-bahanna janah adi banci mbuelah tasakkenndu. Selain si e, banci gunakenndu pangan si la keri guna erban pangan si deban. Sope kam belanja, banlah daftar kai saja si man tukuren gelah ula tukurindu kai si la perlukenndu. Tukurlah buah ras gule-gulen si sangana musim perban biasana lebih murah ergana. Ula tukurndu pangan cepat saji. Banci ka suanndu gule-gulen deher rumahndu.

•   Baju. Ula tukurndu baju guna ngikutken mode baju si gundari, tapi tukurlah bajundu adi bajundu e enggo lanai banci ipake. Daramilah barang si diskon ntah pe barang loak si mejile denga. Kerahkenlah bajundu bas jemuren adi mejile cuacana janah cocok keadanna. Enda banci nampati gelah hemat tagihen listrikndu perban la perlu pakendu mesin pengering.

•   Barang si Mbaru. Sope tukurndu barang, ukurilah, ‘Ngasup nge aku nukursa? Perlu kin aku e?’ Banci nge ula lebe tukurndu barang ras alat elektronik ntah pe kendaran si mbaru? Janah, banci nge dayakenndu barang-barang si lanai pakendu ntah pe si lanai perlukenndu? Adi bage banndu, banci reh kurangna barang bas rumahndu janah reh tambahna uang masukndu.

 Si Banci Lakokenndu: Adi rempet kurang uang masukndu, situhuna e kesempaten si mejile guna mpengadi kebiasan si la mehuli si engkeriken sen. Contohna ngisap ras man belo, erjudi, ntah pe minem-minem. Adi pengadindu kebiasan e, reh ulina me keuangenndu bage pe kegeluhenndu.

 Pedah Pustaka: “Ermeriah ukur me kalak si perlu akapna tandaina Dibata.”​—Matius 5:3.

 Bas Pustaka lit pedah si mejile enda, “Kepentaren eme perlindungen bali bagi sen banci ngelindungi. Tapi ise si lit kepentaren ras pemeteh bas ia, si e erguna njagai geluhna.” (Pengerana 7:12) Kepentaren si bage lit bas Pustaka, janah enterem kalak si ndalankenca enggo isampati gelah la kuatirsa kerna masalah keuangen.​—Matius 6:31, 32.