Enterem kalak si kuatir ngidah doni enda. Doni enda enggo ceda perban ulah manusia, piah dungna terancam kegeluhen si lit i je. Menurut pakar lingkungen, gundari enggo reh buena jenis binatang-binatang bage pe sinuan-sinuan si punah perban ulah manusia.

 Adi bage, cedai jelma nge pagi lalap doni enda? Ntah lit nge pagi masana reh jilena doni enda iban manusia?

 Melala pakar si tek maka situhuna banci nge jelma nggeluh i doni enda janah la cedaina doni enda. Tapi, melala perubahen si arus iban kalak e. Contohna:

•   Reh ulina min carana ngolah taneh, kerangen, taneh si erlau (rawa-rawa), bage pe laut.

•   Ncubaken cara-cara si mbaru i bas erjuma bage pe ngganti sumber energi.

•   Ubah carana pangan ihasilken gelah buen pan kalak pangan arah sinuan-sinuan asangken ikan ntah pe daging. Selain si e, gelah ikurangi pangan si isia-siaken ntah pe iambekken.

•   Isadari jelma min keriahen ukurna labo erta si nentukenca.

 Uga menurutndu? Banci kin siarapken pemerentah, pebisnis, ras masyarakat kerja sama erban perubahen si mbelin si lenga pernah ilakoken? Ntah si e la mungkin terjadi perban lit kalak si merangap, egois, ras la diatena masa depan?—2 Timotius 3:1-5.

 Adi sibaca Pustaka, banci kita tek maka doni enda reh ulina nge pagi. Bas Pustaka, lit ijelasken engkai maka usaha manusia saja la bias guna nelamatken doni enda. Selain si e, bas Pustaka pe lit ikataken perubahen kai si arusna ilakoken janah uga pagi perubahen e terjadi.

 Engkai maka usaha manusia saja la bias guna nelamatken doni enda? Si Nciptaken doni enda eme Dibata Jahwe a janah bereNa tanggung jawap guna ngurussa. (Kejadin 1:28; 2:15) Emaka gelah berhasil kalak e ngelakoken tugasna, arus kalak e patuh man Dibata. (Kuan-kuanen 20:24) Tapi masalahna, la kalak e nggit megiken Jahwe janah riahen kapna ngikutken cara kalak e saja. (Pengerana 7:29) Padahal adi la isampati Jahwe, labo ngasup manusia ngurus doni enda, janah kerina si ilakoken kalak e sitik ngenca hasilna.—Kuan-kuanen 21:30; Jeremia 10:23.

 Perubahen kai nge si arus iban? Iban Dibata pagi doni enda lanai icedai jelma. (Ketangkasen 11:18) Labo pagi pekena Dibata pemerentahen ntah pe masyarakat doni enda, tapi igantiNa. (Ketangkasen 21:1) E me sebapna nina Jahwe, “Nenlah! Kuban kerina jadi mbaru.”​—Ketangkasen 21:5.

 Uga pagi carana perubahen e terjadi? Iganti Jahwe pagi pemerentahen manusia alu pemerentahen si i surga si igelari Kerajan Dibata. Rajana eme Jesus Kristus janah ia pagi si merentah doni.​—Daniel 2:44; Matius 6:10.

 Sanga merentah Kerajan Dibata, erlajar pagi manusia uga carana nggeluh bagi si ngena ate Dibata. Perban nggit kalak e megiken Dibata janah ikutken kalak e perentahNa, banci ban kalak e tetap mejile doni enda. (Jesaya 11:9) Ikataken Pustaka kai saja pagi si lakoken Kerajan Dibata gelah rakyatna banci nggeluh ermeriah ukur janah la cedaina doni enda. Si nandangi ilakoken Kerajan e eme:

•   Mereken pangan man kerina kalak.—Masmur 72:16.

•   Sumber daya alam ipesikap mulihi.—Jesaya 35:1, 2, 6, 7.

•   Jelma ras binatang banci erdame.—Jesaya 11:6-8; Hosea 2:18.

•   Bencana alam lanai lit.—Markus 4:37-41.

 Teklah kam lanai ndekah kerina perubahen e pasti ilakoken Kerajan Dibata. Adi merhat kam meteh terbuen, banci bacandu artikel “Ndigan Kerajan Dibata Merentah Doni?”