“Ateta normal min mulihi kegeluhenta.”—Angela Merkel, kanselir Jerman.

 Banci saja setuju kam ras kata-kata e perban ngasa gundari sigejapken denga pengaruh pandemi COVID-19. Tapi uga kin kegeluhen “normal” e? Kegeluhen si uga kin si arapken kalak?

•   Kegeluhenna mulihi bagi sope lit pandemi. Bebas min atena ia ngerana-ngerana ras temanna la make masker, pulung-pulung, salamen, bage pe gawah-gawah. Nina dr. Anthony Fauci, a ‘Menurut kalak e nggeluh normal e maksudna banci ia bebas lawes ku restoran, bioskop, ras ingan si debanna.’

•   Reh ulina min kegeluhenna. Situasi doni si gundari reh susahna. Lit kalak si latihsa kapna erdahin, stres, janah lit ka kalak si ngadapi perbahanen si la adil. Emaka enterem kalak gundari erpengakap maka doni enda perlu ipesikap gelah kegeluhenna banci reh ulina. Klaus Schwab, pendiri Forum Ekonomi Dunia ngataken, “Perban pandemi enda, lit kesempatenta guna ngukuri kai saja si perlu ipesikap bas doni enda.”

 Enterem kalak si terpengaruh kel kegeluhenna perban pandemi enda. Emaka lanai kapna mungkin kegeluhenna banci “normal” mulihi. Contohna, lanai lit dahinna, rumahna, sakit ia, ntah pe lit ka keluarga ntah temanna si mate.

 Memang labo siteh pastina uga kari kegeluhenta kenca dung kari pandemi. (Pengerana 9:11) Tapi Pustaka banci nampati kita gelah ula lebihsa arapenta, janah ngasup kita ngadapi uga pe kari keadanna. Selain si e, arah Pustaka banci siteh lit masa depan si cerah ras pasti, si banci saja la pernah bayangkenndu.

 Gundari kita nggeluh bas kedungen jaman. Mbarenda nari enggo ikataken Pustaka bas kedungen jaman lit pagi “wabah penakit.” (Lukas 21:11; Matius 24:3) Emaka la kita senggetsa sanga kai si ikataken Pustaka e terjadi.

 Gunana meteh kerna si e: Situasi pandemi enda banci saja reh ulina. Tapi enggo ingetken Pustaka kita maka kita nggeluh bas “masa si sulit janah bahaya.” (2 Timotius 3:1) Adi siteh kerna si e, banci masuk akal perukurenta kerna kegeluhenta si gundari.

 Tapi ikataken ka bas Pustaka maka keadan doni si reh serana enda nandangi berubah. Kai maksudna?

 Bas Pustaka labo saja ikataken kerna situasi sulit si terjadi gundari. Tapi ikataken ka kerna masa depan si cerah si nandangi terjadi. Dibata ngenca si banci erbanca, labo pemerentahen manusia. Nina Pustaka, “Apusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit.”—Ketangkasen 21:4.

 Dibata Jahwe b enggo erjanji, “Nenlah! Kuban kerina jadi mbaru.” (Ketangkasen 21:5) Idungi Dibata pagi kerina masalah si lit bas doni enda termasuk masalah si reh parahna perban pandemi. Enda me pagi si iban Dibata:

•   Dagingta ras pikirenta tuhu-tuhu sehat. Lanai pagi lit penakit ras kematen.—Jesaya 25:8; 33:24.

•   Sidat dahin si erban meriah ukurta, lanai kita stres ntah pe latihsa.—Jesaya 65:22, 23.

•   Lanai lit kalak si kurang pangan bage pe si mesera.—Masmur 72:12, 13; 145:16.

•   Lanai pagi siinget kai pe si erban latih ukurta, janah banci ka kita jumpa ras kalak si keleng ateta si enggo ipegeluh mulihi.—Jesaya 65:17; Perbahanen Rasul-Rasul 24:15.

 Gunana meteh kerna si e: Nina Pustaka, ‘Arapenta e bagi jangkar bas geluhta.’ (Heber 6:19) Arapenta kerna masa depan si cerah banci erban kita paguh. Maksudna, amin pe lit situasi sulit si terjadi, banci kita tetap tenang, la kuatirsa, ras banci ka meriah ukurta.

 Tapi terteki nge janji-janji si lit bas Pustaka? Nenlah artikel “Pustaka si Badia—Sumber si Terteki.”

•   Ingetlah meherga kel kegeluhenndu

   Ayat: ‘Kepentaren erguna njagai kegeluhen.’—Pengerana 7:12.

   Maksudna: Ula ban keputusen si mbelin resikona kam banci kena COVID-19. Daramilah informasi si lit bas daerahndu. Misalna, piga kalak si enggo kena COVID-19, piga persen penduduk si enggo ivaksin lengkap, janah protokol kesehaten kai si berlaku.

•   Tetaplah hati-hati

   Ayat: “Kalak si pentar hati-hati janah silahkenna kai si jahat, tapi kalak si motu buru-buru janah teksa ia man dirina.”—Kuan-kuanen 14:16.

   Maksudna: Teruslah ikuti protokol kesehaten. Menurut para ahli, virus corona e ndekah nge kari maka bene.

•   Daramilah informasi si terteki

   Ayat: “Kalak si la erpengalamen, tek man kerina ranan, tapi kalak si cerdik, ukurina tiap langkahna.”—Kuan-kuanen 14:15.

   Maksudna: Ukurilah manjar-anjar petunjuk si apai atendu ikutkenndu. Pilihenndu mbelin kel pengaruhna. Adi ikutkenndu informasi si salah, mbelin kemungkinenna banci kam sakit.

•   Tetaplah positip perukurenndu

   Ayat: “Ula nindu, ‘Engkai maka jaman si mbarenda ulin asangken jaman si gundari?’ Sebap e labo penungkunen kalak pentar.”—Pengerana 7:10.

   Maksudna: La soal uga keadanndu gundari, lakokenlah si mehulina. Ula lalap ukurindu kegeluhenndu sope lit pandemi, perban mbelin kemungkinenna si mehulina saja si ingetndu. Selain si e, ula lalap ukurindu kai saja si la banci lakokenndu perban lit pandemi.

•   Hamatilah kalak si deban

   Ayat: “Hamatilah erbage-bage jelma.”—1 Petrus 2:17.

   Maksudna: Beda-beda pendapat kalak kerna pandemi COVID-19. Ergailah pendapat kalak e, tapi ula ubah keputusen si mehuli si enggo banndu. Perlu ka ukurindu kalak si la ivaksin, si enggo metua, bage pe kalak si lit masalah kesehatenna.

•   Sabarlah kam

   Ayat: “Kekelengen e sabar ras mehuli.”—1 Korinti 13:4.

   Maksudna: Lit piga-piga kalak si mbiar ngelakoken kegiaten si biasa lakokenna sope pandemi, ukurilah perasanna e. Selain si e, amin pe situasi enggo reh ulina janah reh buena kegiaten si banci lakokenndu, sabarlah kam. Ula buru-buru erban rencana.

 Malem kel ate Saksi-Saksi Jahwe meteh janji Pustaka kerna masa depan si cerah. E nampati kalak e la putus asa amin pe lit pandemi. Ikutken kalak e ka nasehat Pustaka gelah ratur reh ku perpulungen janah mpegegehi sada ras si debanna. (Heber 10:24, 25) Ise pe banci reh ku acara perpulungen Saksi-Saksi Jahwe, si iban secara virtual sanga pandemi.

 Enterem kalak enggo gejapkenna gunana reh ku perpulungen Saksi-Saksi Jahwe. Contohna, lit sekalak diberu si kena COVID-19 si reh ku acara perpulungen Saksi Jahwe secara virtual. Terpegegehi kel ia perban reh ku acara e. Nina, “Enggo jadi bagin keluarga enda kuakap aku. Perban mbaca Pustaka, banci tenang ras dame kuakap. Si kuukuri eme arapen bas masa depan, labo masalahku. Bujur melala, dungna banci kugejapken ndeher aku ras Dibata. E me sura-suraku mbarenda nari.”