“Perubahen iklim enggo jadi sada bencana. Kentisik nari doni enda lanai bo teringani.”—The Guardian.

 Situhuna, bencana si terjadi e perban ulah manusia. Menurut enterem ilmuwan, pemanasen global terjadi perban kai si enggo ilakoken manusia. Dungna, perban lalap reh lasna, iklim berubah janah terjadi me bencana. Misalna:

•   Cuaca ekstrem, contohna gelombang panas, ndekahsa lego, ras badai. Enda kerina reh parahna janah reh rusurna terjadi. Akibatna, reh rusurna terjadi banjir ras kebakaren hutan.

•   Gletser ras es bas Kutub Utara lalap mencair.

•   Permukaan laut pe terus naik.

 Pengaruh perubahen iklim seh ku sebelang doni. Bas sada laporen kerna situasi bas 193 negara, bagenda nina New York Times, “Doni enda sangana mindo penampat.” Perban perubahen iklim, enterem kalak dungna menderita janah lit ka si mate. Ikataken Organisasi Kesehatan Dunia maka perubahen iklim e jadi “ancamen si mbelinna man kesehaten manusia.”

 Tapi situhuna, labo perlu kita mbiar kerna kai si terjadi bas masa depan. Mbarenda nari enggo ikataken Pustaka kai pagi si terjadi bas jamanta enda. Janah bas Pustaka pe enggo ikataken Dibata maka pesikapNa pagi doni enda jadi reh jilena.

 Enggo ikataken Pustaka kai saja si terjadi gundari.

 Nina Pustaka si Badia: “Bas wari-wari pendungi reh pagi masa si sulit janah bahaya. Sebap manusia pagi engkelengi dirina saja, mata duiten, . . . la setia, . . . la nggit arih-arih, . . . penghianat, keras kepala.”—2 Timotius 3:1-4.

 Enggo ikataken bas Pustaka kerna sipat enterem kalak gundari. Janah sipat-sipat e me si erban terjadi masalah perubahen iklim. Pemerentah bage pe pebisnis pentingen akapna sen asangken masa depan manusia. Amin pe kalak e erusaha gelah banci kerja sama, tapi labo seri pendapat kalak e kerna kai si arus lakokenna guna mpengadi pemanasen global.

 Bas ayat ndai siteh maka teremen kalak la nggit ngubah sipatna janah la nggit erusaha nelamatken doni enda. Selain si e, ikataken ka bas Pustaka maka kalak si mentingken bana “reh dekahna reh jahatna.”—2 Timotius 3:13.

 Arah Pustaka siteh maka Dibata Jahwe a Si Nciptaken kita, tuhu-tuhu ermediate man doni enda ras man kerina si nggeluh i je. Mari siperdiateken telu ayat Pustaka si mbuktiken maka labo pediat Dibata doni enda hancur.

1.  1.Ciptaken Dibata doni “labo perban la lit tujunna tapi guna iingani.”—Jesaya 45:18.

    Enda me sura-sura Dibata man doni enda janah e pasti terjadi. (Jesaya 55:11) Labo pediat Dibata doni enda ihancurken ntah pe lanai teringani.

2.  2.“Kalak si meteruk ukur ndatken doni enda pagi, meriah kel pagi ukur kalak e perban dem kedamen i je. Kalak si benar pagi si ndatken doni, ringan ia i je seh rasa lalap.”​—Masmur 37:11, 29.

    Erjanji Dibata maka manusia nggeluh pagi alu dame bas doni enda seh rasa lalap.

3.  3.“Kalak jahat ikernepken pagi arah doni nari.”—Kuan-kuanen 2:22.

    Erjanji Dibata maka ikernepkenNa pagi kalak si terus ngelakoken kai si jahat, termasuk kalak si ncedai doni.

 Bagi si enggo ijanjiken Dibata, ipehuliNa pagi keadan doni enda. Lakoken Dibata enda arah KerajanNa si merentah surga nari ku doni. (Matius 6:10) Kerajan Dibata la perlu arih-arih ntah pe erban perjanjin ras pemerentahen manusia guna ndungi masalah lingkungen ras nelamatken doni. Igantiken Kerajan Dibata pagi kerina pemerentahen manusia.—Daniel 2:44.

 Sanga merentah pagi Kerajan Dibata, kerina manusia nggeluh ermeriah ukur janah doni enda pe mejile mulihi. (Masmur 96:10-13) Mari siperdiateken kai saja pagi si ilakoken Dibata Jahwe arah KerajanNa.

•   Keadan doni reh ulina

   Nina Pustaka si Badia: “Taneh mesawang ras taneh si gersang ermeriah ukur pagi, gurun pasir pe ermeriah ukur janah dem bunga-bunga.”—Jesaya 35:1.

   Si terjadi kentisik nari: Ipehuli Jahwe pagi doni enda, termasuk ingan-ingan si enggo seh kel cedana perban ulah manusia.

•   Lanai pagi lit bencana alam

   Nina Pustaka si Badia: “Pengadi [Jahwe] angin badai e, janah ombak laut pe jadi tenang.”—Masmur 107:29.

   Si terjadi kentisik nari: Lanai pagi lit bencana alam ntah pe cuaca ekstrem si erban kalak menderita.

•   Manusia iajari ngurus doni

   Nina Pustaka si Badia: “Kubere pagi kam pengertin ras Kuajari dalan si arus dalanindu.”​—Masmur 32:8.

   Si terjadi kentisik nari: Enggo bereken Jahwe tugas ras tanggung jawap man manusia guna ngurus doni enda. (Kejadin 1:28; 2:15) Emaka pasti ajariNa kita uga carana ngurus ciptanNa, ras uga carana gelah la sicedai doni enda.