Bas pagi-pagi si lampas tanggal 24 Februari 2022, Ukraina iserang Rusia. Situhuna enggom iusahaken peminpin-peminpin si lit bas doni enda gelah ula min terjadi perang. Tapi tetap denga iserang Rusia Ukraina. Kai nge kira-kira pengaruh perang e man kalak i sebelang doni? Sekretaris Jenderal Perserikatan Bangsa-Bangsa, António Guterres ngataken, “Persoalen enda erban enterem kalak menderita, melala si ceda, janah terganggu perdamen bas Eropa bage pe i sebelang doni.”

•   Enggo ikataken Jesus Kristus maka bas wari-wari pendungi, “bangsa ngelawan bangsa pagi, kerajan ngelawan kerajan.” (Matius 24:7) Guna meteh terbuen kerna kai si ikataken Pustaka kerna perang, banci bacandu artikel “Apa Saja Tanda ’Hari-Hari Terakhir’, atau ’Akhir Zaman’?”

•   Bas buku Ketangkasen, perang ipeseri bagi si ngersak kuda, si kudana “warna megara bagi api” janah “buatna perdamen bas doni enda.” (Ketangkasen 6:4) Guna meteh terbuen kerna topik enda, banci bacandu artikel “Empat si Ngersak Kuda—Ise kin e?”

•   Enggo ikataken bas buku Daniel maka “raja utara” simusuhen ras “raja selatan.” (Daniel 11:25-45) Guna meteh engkai maka Rusia ras negara-negara si ndukungsa igelari raja utara, banci tontonndu video Nubuat si Terjadi—Daniel Pasal 11. a

•   Bas buku Ketangkasen lit ikataken kerna ‘perang bas wari si mbelin eme wari Dibata Si Madakuasa.’ (Ketangkasen 16:14, 16) Kentisik nari terjadi me perang e. Tapi enda labo perang bangsa ngelawan bangsa bagi si terjadi gundari. Guna meteh terbuen kerna perang si ikataken bas buku Ketangkasen e, banci bacandu artikel “Apa Perang Armagedon Itu?”

•   Ikataken Pustaka maka ‘ipengadi Dibata pagi peperangen i belang-belang doni.’ (Masmur 46:9) Guna meteh terbuen kerna masa depan si ijanjiken Dibata, banci bacandu artikel “Harapan Cerah yang Pasti Terwujud.”

•   Iajarken Jesus pengikutna ertoto gelah reh min Kerajan Dibata. (Matius 6:9, 10) Kerajan Dibata eme pemerentahen i surga si erban peraten Dibata terjadi pagi i doni, termasuk gelah doni enda jadi dame. Guna meteh terbuen kerna kai saja si ilakoken Kerajan Dibata, banci tontonndu video Kai kin Kinirajan Dibata e?

 Lit lebih 129.000 Saksi-Saksi Jahwe i Ukraina. Bali bagi kerina Saksi Jahwe si lit bas negara si deban, usih kalak e Jesus guna tetap netral secara politik ras la ikut perang. (Johanes 18:36) I sebelang doni, terus iberitaken Saksi Jahwe maka Kerajan Dibata ngenca si banci ndungi kerina masalah manusia, termasuk perang. (Matius 24:14) Adi tehndu atendu kerna masa depan si ijanjiken Dibata, banci hubungindu kami.