Uga Carana gelah Lanai Kam Candu Minem Inemen Alkohol?
Lit kalak si reh buena inemna inemen alkohol sanga stres ia, melungen kapna, ntah pe sangana ia bosan. Adi kam uga? Reh buena nge inemndu inemen si lit alkoholna gundari? Adi ue, uga carana gelah ula mbuesa inemndu ntah pe gelah ula kam sempat candu? Perdiatekenlah piga-piga keterangen enda si banci nampati kam.
Asa nge buena inemen alkohol si banci iinem?
Nina Pustaka si Badia: “Ula ersada ras kalak si mbuesa minem anggur.”—Kuan-kuanen 23:20.
Cuba ukuri: Labo ilarang Pustaka kita nginem inemen si lit alkoholna. (Pengerana 9:7) Tapi menurut Pustaka, la banci mbuesa siinem ntah pe jadi mabuk kita. (Lukas 21:34; Epesus 5:18; Titus 2:3) Adi mbuesa siinem aminna pe la seh ngasa mabuk, e banci ngerugiken kita. Dungna banci siban keputusen si salah, kesehatenta jadi terganggu, janah kita ras kalak si deban pe banci lanai siangkan.—Kuan-kuanen 23:29, 30.
Melala pemerentah si ngakui maka perlu iban batasna minem inemen si lit alkoholna. Emaka ibanna batasna kerna asa buena inemen alkohol si banci iinem bas sada wari, janah asa buena i bas sada minggu. a Memang la seri pengaruhna man tiap jelma. Tapi bas situasi tertentu, ulin adi la inemna sitik pe inemen si lit alkoholna. Menurut Organisasi Kesehatan Dunia:
“Mon-mon minem sada ntah pe dua gelas saja enggo mbuesa, contohna:
Sanga maba kendaran ntah pe erdahin alu nggunaken mesin.
Sangana hamil ntah pe pepinemken.
Sangana nggunaken tambar tertentu.
Adi lit masalah kesehaten.
Lanai banci ngadi minem adi enggo ibenaken.”
Tanda-tanda enggo candu minem alkohol
Nina Pustaka si Badia: “Mari sipereksa ras siselidiki lagu langkahta.”—Perngandungen 3:40.
Cuba ukuri: Gelah ula kam sempat candu minem inemen alkohol, perlu ratur pereksandu kebiasanndu minem janah banlah perubahen adi iperluken. Enda me tanda-tandana adi kam enggo candu.
La kapndu meriah adi la inemndu inemen alkohol. Arus kapndu kam minem gelah banci lebih tenang, percaya diri, ras semangat. Rusur ka kam minem-minem adi sangana mbue masalahndu.
Reh buena inemndu asangken si enggo-enggona. Reh rusurna kam minem, janah reh kerasna ka alkohol si inemndu perban inemen si mbarenda lanai lit pengaruhna man bandu.
Kebiasanndu minem erban lit masalahndu bas keluargandu ntah pe bas inganndu erdahin. Misalna, perban enggo melala kerikenndu sen guna nukur inemen alkohol, dungna buen uang keluarndu asangken uang masukndu.
Kenca minem-minem, lakokenndu kai si banci mbahayaken kam bage pe kalak si deban, bagi maba kendaran, erlangi, ntah pe erdahin nggunaken mesin.
Kataken kalak maka enggo mbuesa kam minem. Sanga begindu rananna e, merawa kam janah daram-daramindu alasen. Kenca si e, mulai kam erbuni-buni nginemsa ntah erbual kam kerna asa buena si inemndu.
Mesera kapndu mpengadisa. Enggom pernah cubakenndu gelah ngadi minem ntah pe ikurangindu, tapi lalap la berhasil.
Lima saran gelah lanai candu
1. Banlah rencana.
Nina Pustaka si Badia: “Rencana kalak rajin pasti berhasil.”—Kuan-kuanen 21:5.
Cubaken enda: Bas sada minggu, tentuken bas wari kai saja inemndu inemen alkohol. Tapi banndulah silang-langna lit dua wari la kam minem. Ban ka batasna asa buena si banci inemndu bas sada wari.
Sada organisasi sosial bas Inggris si ermediate man masalah kecanduan alkohol ngataken, “Cara si mehulina gelah lanai candu minem inemen alkohol eme ban jadwalna ndigan saja la inemndu.”
2. Dalankenlah rencana si enggo ibanndu.
Nina Pustaka si Badia: “Dungilah kai si enggo mulai kena.”—2 Korinti 8:11.
Cubaken enda: Perdiatekenlah asa buena alkohol bas sada inemen. Tujunna gelah banci tehndu ras batasindu asa buena inemen alkohol si banci inemndu. Daramilah inemen si deban si entabeh kapndu nginemsa, si sehat ras la lit alkoholna. Janah banlah stok inemen e bas rumahndu.
Institut Penyalahgunaan dan Kecanduan Alkohol Nasional Amerika Serikat ngataken, “Perubahen-perubahen si kitik pe banci mbelin pengaruhna perban e banci nampati kam lanai candu minem inemen alkohol.”
3. Ula kam menukah tergoda.
Nina Pustaka si Badia: “Katakenlah ‘Ue’ adi ue janah ‘Lang’ adi lang.”—Jakup 5:12.
Cubaken enda: Adi enggo banndu keputusen guna la minem, sanga lit pe kalak si nawarken inemen alkohol man bandu, tulaklah e alu sopan.
Nina Institut Penyalahgunaan dan Kecanduan Alkohol Nasional Amerika Serikat, “Reh terna itulakndu, reh belinna sura-surandu guna la nyerah.”
4. Ingetlah rusur kai gunana.
Nina Pustaka si Badia: “Kai pe ulin kap kedungenna asangken bena-benana.”—Pengerana 7:8.
Cubaken enda: Tulislah kai saja gunana adi berhasil batasindu asa buena si inemndu. Contohna, banci reh tabehna kapndu medem, reh sehatna kam, reh kurangna uang keluarndu, janah reh ulina hubungenndu ras kalak si deban. Sanga ceritakenndu keputusenndu man kalak si deban, ingetlah lalap kai gunana, labo tentangenna.
5. Pindolah penampat Dibata.
Nina Pustaka si Badia: “Ngasup aku ngadapi kai pe perban gegeh si kualoken arah Dibata nari.”—Pilipi 4:13.
Cubaken enda: Adi enggo candu kam, ertotolah kam mindo penampat Dibata. Pindolah penampatNa gelah ula kam tergoda janah banci kendalikenndu dirindu. b Pelajarilah Pustaka gelah banci datndu pedah-pedah si erguna. Alu penampat Dibata, banci lanai kam candu.
a Contohna, menurut Departemen Kesehatan dan Layanan Masyarakat Amerika Serikat, inemen alkohol si enggo mbuesa iinem eme: “Adi diberu lebih 4 gelas per wari ntah pe lebih 8 gelas per minggu. Adi dilaki lebih 5 gelas per wari ntah pe lebih 15 gelas per minggu.” Beda-beda takaren standar bas tiap negara, emaka pindolah saran dokter gelah banci tehndu batasen si cocok man bandu.
b Adi meserasa kapndu mpengadi kebiasanndu minem-minem, banci daramindu penampat kalak si ahli.
