Video-video bas kebaktin regional kena kel ku pusuhta janah nampati kita gelah reh bagesna pengangkanta kerna ajaren Pustaka. Bas Kebaktin Regional 2020 “Teruslah Ermeriah Ukur”! lit 114 video, termasuk 43 rekamen khotbah si ipeseh anggota Badan Pinpinen ras sinampatisa. Tehndu nge kai saja si enggo ilakoken janah sekai biayana erban kerina video e?

 Menam 900 turang seninata arah sebelang doni ikut nggunaken waktuna ras keterampilenna i bas nikapken acara e. Lebih dua tahun dekahna, gunaken kalak e menam 100.000 jam guna proyek e. Enda termasuk 70.000 jam si igunaken i bas erban drama Pustaka Nehemia: ‘Keriahen si Ibereken Jahwe Erbanca Kam Megegeh’ si dekahna 76 menit.

 Pasti seh kel buena biaya guna ngurus keperlun kerina sukarelawan e, bage ka pe biaya guna peralaten ras melala fasilitas si iperluken guna proyek e.

 Jared Gossman, si erdahin bas Layanen Audio/Video ngataken, “Merhat kel Panitia Pengajaren arah Badan Pinpinen gelah melala ingan ras budaya icidahken bas video-videota. Cidahken kalak e atena maka turang seninata lit i sebelang doni. Emaka, lit 24 tim bas 11 negri si ikut ndahiken proyek e. Gelah kerina tim si lit i sebelang doni e banci kerja sama alu mehuli, iperluken rencana ras pengaturen si mejile bage pe melala biaya.”

 Lit peralaten ras pengaturen khusus si isikapken guna erban melala videota. Misalna, ban kami pengaturen ntah pe set guna film Nehemia: ‘Keriahen si Ibereken Jahwe Erbanca Kam Megegeh’ bas studio Mount Ebo deher Patterson, New York, Amerika Serikat. Usahaken kami erban film e gelah cocok ras sejarahna. Janah gelah hemat biayana, pake turang seninata bahan-bahan si menahang guna erban tembok si mirip bagi tembok Jerusalem mbarenda. Tiap tembok iban arah rangka kayu si ganjangna enem meter janah ilapisi busa ras icet gelah teridah bagi batu. “Tembok-tembok” e banci igeser-geser gelah banci ipake bas melala adegan. Amin gia bage, biaya si keri guna erban set film e saja menam kira-kira 1,5 miliar rupiah. a

 Pasti reh bagesna pengerganta kenca siteh uga acara kebaktin regional enda isikapken. Kerina usaha si enggo ilakoken pasti erban Jahwe ipuji i sebelang doni. Bujur melala perban enggo meriah ukurndu mereken sumbangen guna dahin sebelang doni arah donate.pr418.com bage pe arah cara-cara si debanna.