Majalah The Watch Tower 1 Juni 1912 ngataken, “Banci saja lit sitandai kalak pentang. Lit buku si banci baca kalak e perban icetak alu hurup timbul. Enterem kalak pentang si enggo megi berita si meriah kerna masa depan janah meriah kel ukur kalak e.”

 Sanga majalah e itulis, beda-beda cara penulisen hurup timbul ntah pe hurup Braille bas negara-negara si nggunaken bahasa Inggris. Amin gia bage, sanga si e enggo iban Saksi Jahwe buku-buku si nggunaken hurup Braille. Janah ngayak gundari terus denga iban Saksi Jahwe buku-buku si bage. Gundari, buku-bukuta si nggunaken hurup Braille enggo lit lebih 50 bahasa. Uga nge cara erbanca?

 Si tangtangna perlu ilakoken eme ngubah tulisen jadi hurup timbul. Michael Millen, si erdahin bas Layanan Pengolahan Teks bas Patterson, New York, ngataken, “Mbarenda guna ngubah tulisen jadi hurup Braille, sigunaken program si iban perusahan si deban. Tapi program e la banci ngasilken hurup Braille bas melala bahasa. Emaka gundari sigunaken Sistem Penerjemahen Sora Ermomo (Watchtower Translation System). Program enda banci ngasilken hurup Braille bas hampir kerina bahasa. Adi menurutku, labo lit program si deban si bagenda.”

 Bas baca-bacanta si nggunaken hurup Braille, gambar-gambarna pe ijelasken. Contohna, gambar bas sampul buku Ermeriah Ukur Seh Rasa Lalap! lit penjelasenna bagenda: “Sekalak dilaki erdalan bas ingan si udarana segar janah i sekitarna lit sinuan-sinuan si mejile, bukit-bukit, ras gunung.” Lit sekalak turang seninata gelarna Jamshed, ia sinampati runggun, perintis, tapi ia pentang. Nina, “Erguna kel keterangen gambar e man bangku.”

 Kenca tulisenna iubah jadi hurup timbul, file e ikirim ku kantor-kantor cabang si ncetak bacan hurup Braille. Kertas si ipake guna ncetaksa mekapal, gelah sanga hurup timbul e icetak, kertasna la merigat janah gelah banci ndekah tahan. Kenca dung icetak, kerina kertas e ipersada, ijilid, janah ikirimken ras bacan si debanna ku runggun-runggun. Adi bas kantor pos lit jasa pengirimen gratis man kalak pentang, baca-bacan e banci ikirimken arah je nari. Adi perlu, banci ka gunaken kantor cabang jasa pengirimen cepat gelah baca-bacanta e banci igunaken turang seninata si pentang bas perpulungen.

 Melala waktu ras sen si iperluken guna erban baca-bacan bas hurup Braille. Contohna, bas percetaken i Wallkill, New York, guna erban 2 Pustaka si Badia hurup Braille seri dekahna ras erban 50.000 Pustaka si Badia hurup biasa. Sada Pustaka hurup Braille bas bahasa Inggris ibagi jadi 25 jilid. Bahan guna erban Pustaka hurup Braille e 123 kali lipat ergan asangken bahan guna erban Pustaka hurup biasa. Erban sampul 25 jilid e saja pe perlu biaya kira-kira dua juta rupiah!

 Uga perasan turang seninata si ikut erban baca-bacan Braille? Nadia, si ngelayani bas kantor cabang Afrika Selatan ngataken, “Pasti mberat situasi turang seninata si pentang. Emaka ngata bujur kel aku perban lit si banci kulakoken guna nampati kalak e. Pasti keleng kel ate Jahwe kalak e.”

 Uga adi lit kalak si pentang tapi la ia beluh mbaca hurup Braille? Guna nampati kalak e, piga-piga tahun si lewat iterbitken organisasita buku Erlajar Mbaca Hurup Braille (Learn to Read Braille). Bas buku e lit hurup Braille bage pe hurup biasa, gelah kalak si pentang bage pe si la pentang banci ras-ras mpelajarisa. Selain buku e, ibereken ka alat-alat si banci nampati kalak e nulis hurup Braille eme reglet ras stylus. Alu bage, banci itandai ras inget kalak e hurup Braille.

 Kai saja gunana bacan Braille e man turang seninata si pentang? Lit pengalamen turang seninata si tading bas Haiti, gelarna Ernst. Lalap ia reh ku perpulungen, tapi la lit bacan si banci pakena bas perpulungen. Emaka adi komentar atena ntah pe mpeseh khotbah latihen, arus lebe hapalna. Tapi gundari bagenda nina, “Ndigan pe ateku komentar enggo banci kuangkat tanku. Labo kuakap lit aku bedana ras turang senina si deban, sebap kita kerina ngaloken pangan rohani si seri.”

 Lit sekalak pertua i Austria si terganggu pengidahna, gelarna Jan. Ia si mandu Pelajaren Sora Ermomo bage pe Pelajaren Pustaka Runggun. Nina, “Nukahen kuakap mbaca buku-buku hurup Braille si iterbitken Saksi Jahwe asangken buku hurup Braille si debanna. Misalna, adi bas buku-bukuta, lit iban nomor halamenna, nukah ndatken cataten i teruh, janah jelas kel keterangen gambarna.”

 Lit sekalak turang seninata si diberu i Korea Selatan, gelarna Seon-ok. Ia sekalak perintis tapi la erpengidah janah la erpemegi. Mbarenda arus lit kalak si nagangi tanna guna erban isyarat gelah banci angkaina acara perpulungen. Tapi gundari enggo banci bacana sendiri buku-bukuta si nggunaken hurup Braille. Nina, “Mon-mon mesera kuakap mbaca buku-buku si nggunaken hurup Braille perban lit titik-titikna si bene, garis-garisna la lurus, ntah pe kertasna menipessa. Tapi, buku-buku hurup Braille si iban Saksi Jahwe mekapal kertasna janah cetaken hurupna pe jelas. Emaka menukah kuakap mbacasa. Adi mbarenda, arus aku isampati kalak si deban gelah banci kupelajari buku-bukuta. Tapi adi gundari, enggo banci aku erlajar sisada. Meriah kel kuakap perban banci aku erban persiapen perpulungen janah banci mereken komentar. Kubacai kerina buku-buku hurup Braille si iban organisasi. Lalap teku kubaca.”

 Bagi buku-bukuta si debanna, bas bukuta si nggunaken hurup Braille pe lit ka ikataken bagenda: “Buku enda la idayaken. Enda isediaken guna ngajarken Pustaka si Badia i belang-belang doni janah idukung sumbangen sukarela.” Bujur melala perban enggo berendu sumbangen arah donate.pr418.com. Perban meriah ukurndu mere, pangan rohani banci lit man kerina kalak, termasuk man kalak si la erpengidah.