Gundari, sipelajari kerna sekalak anak perana si pernah nelamatken mamana. Gelar mamana eme Paulus. La sieteh ise gelar anak perana e. Tapi si pasti, ia kalak si perpang. Nggit nge kam meteh kai si ilakokenna?​—

I Jerusalem, Paulus imasukken ku bas penjara erkiteken rusur iturikenna kerna Jesus. Lit kalak jahat si segat atena Paulus. Emaka ibanna rencana jahat, ’Mari sipindo puanglima gelah isuruhna pasukenna maba Paulus ku pengadilen. Cebuni kita, janah adi Paulus lewat, sibunuh ia!’

Bebere Paulus megi rencana jahat e. Kai si ilakokenna? Lawes ia ku penjara janah ipebetehkenna man Paulus. Mis isuruh Paulus ia mpebetehken kerna rencana jahat e man puanglima. Menurutndu, menukah nge iakap bebere Paulus ngelakokenca?​— Lang, erkiteken puanglima e sekalak si erkuasa. Tapi, bebere Paulus pang ngerana man puanglima e.

Puanglima e mis erban tindaken. Isuruhna kira-kira 500 tentera njagai Paulus! Kalak e arus maba ia ku Kesarea i bas berngi e. Selamat nge Paulus?​— Ue, erkiteken kalak jahat e la banci nerang ia! Rencana jahat kalak e gagal.

Kai si banci ipelajarindu i bas cerita enda?​— Kam pe banci pang bagi bebere Paulus. Kita arus pang nuriken kerna Jahwe. Nggit nge kam jadi anak si perpang janah terus nuriken kerna Jahwe?— Adi kam pang, banci iselamatkenndu kalak si deban.