Adi situriken kerna Jahwe, mawen-mawen lit kalak si la senang. Itokohina kita ntah pe irawaina. E banci erban kita mbiar nuriken kerna Jahwe. Pernah nge bage penggejapenndu?​— I bas Pustaka si Badia, lit cerita kerna sekalak anak perana si gelarna Jeremia. Keleng atena Jahwe, janah menam atena ngadi nuriken kerna Jahwe. Mari, sioge ceritana.

Sanga Jeremia nguda denga, isuruh Jahwe ia mpersingeti kalak si deban gelah lanai ngelakoken kai si jahat. Mesera, iakapna janah la ia pang ngelakokenca. Ikatakenna man Jahwe, ’La kueteh kai si man katanken man kalak e. Aku ngudasa denga.’ Tapi, nina Jahwe, ’Ula kam mbiar. Banci Kusampati kam.’

 Emaka, Jeremia pe mulai mpersingeti kalak si deban, adi kalak e la nggit robah, ia banci iukum. Menurutndu, nggit nge kalak e ngikutken kata-kata Jeremia?​— Lang. Malahen itokohina ia ntah pe irawaina. Janah lit ka si atena munuh ia! Menurutndu, uga perasan Jeremia?​— Mbiar kal ia. Nina, ’Lanai aku nggit nuriken kerna Jahwe.’ Tapi, tuhu-tuhu nge ia enggo nerah?​— Lang. Keleng kal atena Jahwe, emaka la ia banci ngadi mpeseh berita kerna Jahwe. Janah erkiteken Jeremia la nggit nerah, ia pe ilindungi Jahwe.

Misalna, piga-piga kalak jahat pernah ngambekken Jeremia ku bas sumur si erkubang. La ia ibere man ntah pe minem. Kalak e nadingken Jeremia ije gelah ia mate. Tapi, erkiteken penampat Jahwe, ia selamat!

Kai si banci ipelajarindu?​— Aminna pe Jeremia mawen-mawen mbiar, terus iturikenna kerna Jahwe. Banci saja iadapindu hal si seri. Lit si nokohi ntah pe si ngerawai kam sanga iturikenndu kerna Jahwe. Banci jadi mela iakapndu ntah pe mbiar erkiteken si e. Tapi, ula nerah. Teruslah turiken kerna Jahwe. Ia lalap nampati kam, bali bagi Ia nampati Jeremia.