Ietehndu nge ise saja si lit i bas gambar?​— Kalak enda Matius, Markus, Lukas, Johanes, Petrus, Jakup, Judas, ras Paulus. Ia nggeluh sejaman ras Jesus. Janah, itulisna buku kerna Jesus. Buku-buku e lit i bas Pustaka si Badia. Mari, sipelajari kerna penulis enda.

Telu i bas penulis enda eme rasul si pernah erberita si meriah ras Jesus. Ise saja kalak e?​— Matius, Johanes, ras Petrus. Matius ras Johanes rembak kal ras Jesus,  janah ia sekalak-sekalak nulis sada buku kerna kegeluhen Jesus. Johanes pe nulis buku Ketangkasen, ras telu surat si igelari Sada Johanes, Dua Johanes, ras Telu Johanes. Petrus nulis dua surat si deban si igelari Sada Petrus ras Dua Petrus. I bas suratna si peduaken, Petrus nulis maka Jahwe pernah ngerana arah surga nari kerna Jesus, nina, ’Enda me anakKu. Keleng ateKu ia, janah senang ukurKu ibahanna.’

Selain kalak e, i bas gambar lit ka kalak si deban si nulis kerna Jesus. Salah sadana eme Markus. Paksa Jesus itangkap, kemungkinen lit Markus ije janah idahna kai si terjadi. Sada nari eme Lukas. Ia sekalak dokter. Kemungkinen, ia jadi kalak Kristen kenca Jesus mate.

Dua penulis si deban si lit i bas gambar eme agi-agi Jesus. Ise saja kalak e?​— Kalak e eme Jakup ras Judas. Tangtangna, ia la tek man ajaren Jesus. Janah, iakapna Jesus e lit sitik adonna. Tapi, i bas pudi wari kalak e jadi ajar-ajar Jesus.

Penulis si terakhir si lit i bas gambar eme kap Paulus. Ope denga ia jadi kalak Kristen, gelarna Saul. Tangtangna, segat kal atena kalak Kristen, janah kejam ia man kalak e. Tapi, tehndu nge engkai maka Paulus nggit jadi kalak Kristen?​— I bas sada wari, Paulus sangana erdalan nahe ku kota si deban. Rempet, lit si ngerana arah surga nari. Kepeken e Jesus! Isungkunna Paulus, ’Engkai maka kam kejam kal man ajar-ajarku?’ Kenca kejadin e, Paulus robah janah dungna jadi kalak Kristen. Itulis Paulus 14 buku si lit i bas Pustaka, mulai buku Roma seh buku Heber.

Me sioge nge Pustaka tep-tep wari?— Alu ngoge Pustaka, sieteh melala kerna Jesus. Nggit nge kam meteh terbuen kerna Jesus?​—