PELAJAREN 3
Rahap Tek man Jahwe
Bayangken kam paksana i kuta Jeriho i taneh Kanaan. Penduduk si lit i sekelewetndu la tek man Jahwe. Lit sekalak diberu tading i kuta e, gelarna Rahap.
Sanga Rahap kitik denga, ibegina melala cerita kerna kalak Israel. Misalna, kerna Musa si minpin kalak Israel ndarat i bas Mesir nari kenca si e ngepari Lawit Merah. Ibegina ka maka Jahwe pe nampati kalak e menang i bas perang. Janah gundari, kalak Israel paksana erkemah deher Jeriho!
Rahap ngelindungi dua mata-mata enda erkiteken ia tek man Jahwe
I bas sada berngi, dua kalak mata-mata Israel cebuni-cebuni masuk ku Jeriho guna ngenehen keadan i je. Kalak e reh ku rumah Rahap. Janah, Rahap ngundang kalak e erberngi i je. I bas berngi e ka, raja Jeriho megi berita maka lit mata-mata i kutana janah kalak e lit i rumah Rahap. Mis isuruh raja anak buahna nangkap kalak e. Tapi, Rahap muniken dua mata-mata e i tarum rumahna. Kenca si e nina man anak buah raja, ’Memang ndai kalak e ku jenda, tapi gundari nggo lawes i bas kuta enda nari. Adi pedas iayakindu, pasti banci itundukndu kalak e!’ Menurutndu, engkai Rahap ngelindungi mata-mata e?— Erkiteken ia tek man Jahwe janah ia tek maka Jahwe banci mereken taneh Kanaan man kalak Israel.
Ope denga mata-mata e lawes i bas rumah Rahap nari, erjanji ia maka sanga Jeriho pagi iserang, Rahap ras keluargana banci selamat. Tapi, kalak e mindo gelah Rahap ngelakoken sada hal. Tehndu kin kai e?— Nina, ’Tinali si megara enda arus itambatkenndu i jendelandu. Alu bage, kerina si lit i rumahndu banci selamat.’ Bage me si ilakoken Rahap. Kenca si e, kai si terjadi?—
Jahwe nelamatken Rahap ras keluargana
Piga-piga wari kenca si e, kalak Israel erbaris ngkeleweti kuta e alu la ersora. Ikelewetina kuta e sekali sada wari, janah ilakokenna enem wari dekahna. Tapi, i bas wari pepituken, ikelewetina pitu kali. Kenca si e, ersurak ia kerina alu sora si megang. Rempet, iruntuhken Jahwe tembok-tembok kuta e. Tapi, rumah si lit tinali megarana la ikut runtuh. Gundari, cuba nehen gambar. Apai rumah e?— Rahap ras keluargana selamat!
Kai si banci ipelajarindu?— Rahap tek man Jahwe erkiteken enggo ibegina kerna kehebaten Jahwe. Kam pe gundari paksana erlajar kerna kehebaten Jahwe. Pasti kam pe tek man Jahwe, me?— Mehuli kal!
