PELAJAREN 1
Sada Rahasia si Erban Meriah Ukurta
Pernah nge begindu rahasia?— * I bas Pustaka si Badia, lit sada rahasia si istimewa. Gelarna ’rahasia si badia’. Ikataken rahasia erkiteken mbarenda la lit si metehsa. Janah, ikataken badia erkiteken rahasia e rehna i bas Dibata nari. Malekat merhat kal meteh terbuen kerna rahasia e. Merhat nge kam metehsa?—
Menurutndu, kai si erbanca malekat-malekat enda merhat kal metehsa?
I bas jaman si nai, Dibata nepa Adam ras Hawa. Kalak e ibereken ingan si seh kal jilena, si igelari Taman Eden. Adi mbarenda Adam ras Hawa patuh man Dibata, kalak e ras anak kempuna pasti banci erban doni enda jadi pardis si mejile, bagi taman e. Janah kalak e banci terus tading i je. Tapi, kai si ilakoken Adam ras Hawa?—
Adam ras Hawa la patuh man Dibata. Erkiteken si e me maka gundari kita la tading i Pardis. Tapi nina Dibata, ibanNa pagi doni enda jadi mejile, janah kerina kalak banci nggeluh seh rasa lalap alu ermeriah ukur. Uga cara Dibata ngelakoken si e? Ribun tahun dekahna, la lit si meteh jabapna. E rahasia denga.
Sanga Jesus reh ku doni, iturikenna rahasia e man enterem jelma. Nina, Kinirajan Dibatalah si pagi erban doni enda jadi Pardis si mejile. Erkiteken si e, isuruh Jesus kita gelah notoken Kinirajan Dibata pedas reh.
Meriah nge ukurndu banci meteh kerna rahasia e?— Tapi inget, kalak si patuh man Dibata ngenca si banci tading i Pardis. I bas Pustaka si Badia, lit melala cerita kerna kalak si patuh man Dibata. Nggit nge kam metehsa?— Mari sipelajari ise saja kalak e janah uga carana kita banci ngusih ia.
OGE I BAS PUSTAKANDU
^ par. 3 I bas tep-tep pelajaren, lit penungkunen si iikuti alu tanda si bagenda (—). Enda ertina orang tua perlu ngadi kentisik gelah anak e banci njabapsa.
