PELAJAREN 2
Ribka Nggit Erban Jahwe Senang
Ribka sekalak diberu si engkelengi Jahwe. Perbulangenna gelarna Isak. Ia pe engkelengi Jahwe. Ndigan tangtangna Ribka jumpa ras Isak? Kai buktina maka ia nggit erban Jahwe senang? Mari siperdiateken uga ceritana.
Isak anak Abraham ras Sara. Kalak e tading i taneh Kanaan. Penduduk si tading i je la nembah Jahwe. Abraham la nggit adi Isak ngempoi diberu si la nembah Jahwe. Emaka, isuruh Abraham suruh-suruhenna lawes ku ingan kade-kadena i Haran. Suruh-suruhen e gelarna Elieser janah ia arus lawes ku jah guna ndarami ndehara man Isak.
Ribka nggit mulih-ulih muat lau guna mere minem unta-unta
Elieser pe berkat ras suruh-suruhen si deban. Perdalanen kalak e seh dauhna. Emaka, ibabana sepuluh unta guna maba pangan ras hadiah. Tapi, uga carana Elieser jumpa ras singuda-nguda si cocok man Isak? I Haran, kalak enda ngadi i deher sada sumur erkiteken ietehna enterem kalak muat lau ku je. Kenca si e, ertoto Elieser man Jahwe, ’Adi kupindo kari lau man sekalak i bas singuda-nguda e nari, janah nggit ia mere aku minem ras unta-untangku, singuda-nguda e lah si jadi pilihenNdu.’
La ndekah kenca si e, Ribka reh ku sumur e. Nina Pustaka si Badia, ia seh kal jilena. Elieser pe mindo lau man bana, janah jabapna, ’Minemken Tuan. Lau inemen man untandu pe banci kulegi asa biasna.’ Cuba ukurindu! Unta biasana melala kal minem, emaka pasti mulih-ulih Ribka muat lau. Cuba nehenndu i bas gambar. Mejingkat kal ia, me?— Meriah kal ukur Elieser erkiteken ijabap Jahwe totona.
Kenca si e, ibereken Elieser hadiah si mejile man Ribka. Ribka pe ngundang Elieser ras suruh-suruhen si deban gelah jumpa ras keluargana. Elieser njelasken man kalak e engkai ia reh ku Haran. Nina ka, Ribkalah si ipilih Jahwe guna jadi ndehara Isak. Meriah kal ukur keluarga Ribka janah iijinkenna Ribka erjabu ras Isak.
Ribka lawes ku Kanaan radu Elieser janah erjabu ras Isak
Tapi menurutndu, nggit nge Ribka erjabu ras Isak?— Ribka meteh maka Jahwe-lah si nampati Elieser. Jadi, sanga keluarga Ribka nungkun nggit nge ia ntah lang ikut ku Kanaan janah erjabu ras Isak, jabapna, ’Ue, nggit nge aku.’ Ribka mis berkat ras Elieser. Kenca seh i Kanaan, Ribka pe erjabu ras Isak.
Erkiteken Ribka erban Jahwe senang, ipasu-pasu Jahwe ia. Payo, i bas pudi wari arah kesusurenna me tubuh Jesus! Adi kam bagi Ribka janah erban Jahwe senang, kam pe ipasu-pasu Jahwe.
