PELAJAREN 5
Samuel Tetap Jadi Anak si Mehuli
Sanga Samuel kitik denga, tading ia i bas tabernakel janah ngelayani ije. Tabernakel eme ingan eribadat man Jahwe. Tehndu nge engkai maka sempat Samuel tading ije? Si pemena, perdiateken lebe cerita kerna Hanna, nande Samuel.
Tangtangna, merhat kal Hanna lit anakna, tapi la banci. Emaka ertoto ia. Erjanji ia man Jahwe, adi banci lit anakna, iberekenna anak e guna tading ras ngelayani i bas tabernakel. Kenca si e, ijabap Jahwe totona janah dungna Hanna pe mupus sekalak anak dilaki. Igelarina Samuel. Hanna pe nepati janjina. Sanga umur Samuel kira-kira telu ntah pe empat tahun denga, ibaba Hanna ia ku tabernakel gelah Samuel ngelayani Jahwe ije.
Paksa si e, imam si mbelin i tabernakel eme Eli. Dua anakna pe ngelayani jadi imam. Erkiteken Tabernakel e ingan eribadat, kalak si tading ije arusna mehuli perbahanenna. Tapi, perbahanen anak-anak Eli la mehuli. Samuel ngidah kerina perbahanen kalak e. Ikut-ikuten nge Samuel ngelakoken kai si la mehuli?— Lang, ia tetap jadi anak si mehuli, bagi si iajarken orang tuana.
Menurutndu, kai si arusna ilakoken Eli man anak-anakna?— Arusna iukum Eli kalak e janah la ipediatna terus ngelayani i rumah Jahwe. Tapi kepeken la ilakokenna. Emaka, merawa Jahwe man Eli ras anak-anakna. Iukum Jahwe ateNa kalak e.
Samuel mpeseh kata-kata Jahwe man Eli
I bas sada berngi, sanga Samuel paksana tunduh, ibegina sora ngelebuh ia, ’Samuel!’ Ia pe kiam njumpai Eli. Tapi nina Eli, ’La lit kam kulebuh.’ E terjadi seh asa telu kali. Sanga Samuel reh petelu kaliken, nina Eli man Samuel, ”Adi ilebuhNa kari kam mulihi arus ikatakenndu, ’Ngeranalah Kam Jahwe, aku enggo sikap megikenca.’” Iban Samuel me bage. Kenca si e, ngerana Jahwe man Samuel, ’Kataken man Eli, Kuukum pagi keluargana erkiteken perbahanenna si la mehuli.’ Menurutndu, menukah nge mpeseh kata-kata si bage man Eli?— La menukah iakap Samuel, mbiar ia. Aminna pe bage, tetap ilakokenna perentah Jahwe. Janah, kata-kata Jahwe e tuhu-tuhu terjadi. Duana anak Eli ibunuh, janah Eli pe mate.
Samuel mereken usihen si mehuli man banta. Tetap ia jadi anak si mehuli aminna pe perbahanen kalak si isekelewetna la mehuli. Adi kam uga? Nggit nge kam jadi anak si mehuli bagi Samuel? Adi iusihndu ia, banci ibanndu Jahwe ras orang tuandu ermeriah ukur.
