Ayat-Ayat man Kegeluhen Kristen banci nampati gelah reh nukahna akapndu ndarami ayat bage pe kisah bas Pustaka si erguna sanga kam ngadapi tentangen. Buku enda pe banci nampati kam ndatken ayat si cocok guna mpegegehi ras nampati kalak si deban erban keputusen si erban meriah ukur Jahwe. Pilihlah topik si sesuai ras kai si iperlukenndu. Bas tiap topik lit piga-piga penungkunen bage pe ringkasen arah piga-piga kisah bas Pustaka. (Nen kotak “ Cara Nggunaken Buku Enda.”) Alu bage, banci mis datndu erbage nasehat, petunjuk, ras pengapul arah Kata Dibata. Banci ka datndu prinsip Pustaka si banci gunakenndu bas nampati ras mpegegehi kalak si deban.

Mbue ayat si lit hubungenna ras sada topik, tapi labo kerina ayat e itamaken bas buku enda, piga-piga ayat ngenca si itamaken. Tapi, ayat-ayat e banci nampati kam erban riset terbagesen. (Kua 2:1-6) Carana, bacalah referensi silang ayat e bas Pustaka si Badia Terjemahen Doni si Mbaru, janah adi lit keterangen tambahenna, banci ka bacandu. Selain si e, guna meteh terbagesen erti sada ayat bage pe pelajarenna, nenlah bagin “Ayat si Ijelasken” bas Penampat guna Riset man Saksi-Saksi Jahwe ntah pe Indeks Publikasi Menara Pengawal. Bacalah keterangen si terbaru gelah datndu pemahamen si terbaru kerna sada ayat.

Mbera-mbera buku enda banci nampati kam ndatken pemeteh ras kepentaren si lit bas Pustaka si Badia. Adi terus gunakenndu buku enda, reh tekna me kam maka “kata Dibata e nggeluh janah dem alu kuasa.”—Heb 4:12.