Ate Dibata kerina jelma ngenanami geluh si mehuli i doni enda. Erkiteken keleng ateNa manusia maka itepa Dibata me doni ras kerina isina. Nandangi reh paksana Dibata mereken kinigeluhen si ulin asangken si gundari kempak kerina jelma. IsasapkenNa me pagi kerina si erbahan geluhta mesera gundari.​—Oge Jeremia 29:11.

La lit pemerentahen si enggo banci nasapken kejahaten, pinakit ntah pe kematen. Tapi, lit berita si mehuli man banta. Kentisik nari, pemerentahen manusia isambari Dibata me alu pemerentahenNa. Kerina rayatNa pagi nggeluh sehat i bas dame.​—Oge Jesaya 25:8; 33:24; Daniel 2:44.

Kerina kiniseran manusia masap kenca Dibata ngkernepken kerina kalak si jahat ibas doni enda nari. (Sefanya 2:3) Ndigan e terjadi? Keadan doni si jahat ras si ngancam kegeluhen manusia genduari enggo inubuatken bas Pustaka. Enda kerina nuduhkenca la nari ndekah Dibata ertindak.​—Oge 2 Timotius 3:1-5.

Arus ka nge kita erlajar kerna Dibata arah KataNa nari, Pustaka si Badia. Buku e bali ras sada surat si ikiremken bapa si melias dingen perkeleng. Pustaka nurikenca man banta carana ndatken nggeluh si terulin gundari ras nggeluh si rasa lalap i doni enda pagi. Amin gia bage, banci saja lit kalak si la senang ngidah kam isampati guna ngangkai isi Pustaka e. Tapi, seh kal nge sayangna adi kerna si e kesempatenndu ndatken kegeluhen si seh kal ulina e bene.​—Oge Kuan-kuanen 29:25; Ketangkasen 14:6, 7.