Dibata lebih pentar asangken kita. Ia Bapa si perkeleng, melias dingen mediate, janah ateNa geluhta ermeriah ukur. Kita la itepaNa guna nggeluh bebas i bas bimbingenNa nari. (Jeremia 10:23) Bali ras anak-anak si perlu bimbingen orang tua, kita pe perlu bimbingen Dibata. (Jesaya 48:17, 18) Prinsip ntah pe patoken Pustaka si Badia ibereken Dibata guna mbimbing kita.​—Oge 2 Timotius 3:16.

Alu ngelakoken undang-undang ras patoken Dibata Jahwe, banci sidalani kegeluhen si mehulina genduari, janah pasu-pasu i bas wari si pepagi. Dibata kap Si Nepa kita, emaka bujur nge siban ukurNa senang dingen ngikutken bimbingenNa.​—Oge Masmur 19:8, 12; Ketangkasen 4:11.

Prinsip-prinsip Pustaka si Badia e me kap kebenaren-kebenaren dasar. Sedangken, ukum ntah pe undang-undang ibahan guna keadan tertentu. (Ulangen 22:8) Kita arus nggunaken kengasupen perukurenta guna ndalanken prinsip Dibata i bas keadan tertentu. Contohna, Pustaka si Badia ngajarken kita maka kegeluhenta pemere Dibata. Prinsip dasar enda negu-negu kita i bas ingan erdahin, i rumah ntah pe i bas perdalanen. Alu terus nginget prinsip e, kita pe tetap metenget gelah banci nilahken bahaya.​—Oge Perbahanen Rasul-Rasul 17:28.

Jesus nuriken dua prinsip si pentingna. Prinsip si pemena kerna tujun geluh manusia, e me lako nandai Dibata, ngkelengi Ia dingen setia ndalanken peratenNa. Prinsip si pemena enda perlu siinget sangana erbahan keputusen kai pe. (Kuan-kuanen 3:6) Kerina si ndalanken prinsip enda  banci jadi teman Dibata, ndatken kemalemen ate si serta, janah kegeluhen si rasa lalap.​—Oge Matius 22:36-38.

Prinsip si peduaken, negu-negu kita i bas erurusen ras jelma sideban. (1 Korinti 13:4-7) Gelah banci ndalanken prinsip si peduaken enda, perlu siusih uga cara Dibata erurusen ras manusia.​—Baca Matius 7:12; 22:39, 40.

Alu ndalanken prinsip-prinsip Pustaka si Badia, keluarga-keluarga banci ipersada bas kekelengen. (Kolose 3:12-14) Kata Dibata mereken perlindungen man keluarga arah prinsip sideban. Contohna, Pustaka si Badia ngajarken kita kerna perjabun e me sada iketen si tetap, si la banci iosari asa ndigan pe.​—Oge Kejadin 2:24.

Alu ndalanken prinsip-prinsip Pustaka si Badia, geluhta pe banci puas, dame ras la kekurangen. Misalna, tentu jadi kal ate sekalak tokeh adi si erdahinna jujur dingen mejingkat erkiteken ngelakoken patoken-patoken si itetapken Pustaka si Badia. (Kuan-kuanen 10:4, 26; Heber 13:18) Kata Dibata pe ngajar kita gelah puas kerna kai si lit bas kita. Hubungenta ras Dibata lebih penting asangken erta.​—Oge Matius 6:24, 25, 33; 1 Timotius 6:8-10.

Ndalanken prinsip Pustaka si Badia pe banci ngelindungi kesehatenta. (Kuan-kuanen 14:30; 22:24, 25) Misalna, Pustaka si Badia ngelarang kita mabuk. Adi siikutken, kita pe sehat ras banci nilahi erbage-bage pinakit bage pe bahaya kecelakan. (Kuan-kuanen 23:20) Jahwe la ngelarang kita minem inemen si lit alkoholna asalken la erlebihen. (Masmur 104:15; 1 Korinti 6:10) Prinsip-prinsip Dibata erguna man banta. Alu bage, ngasup kita njaga lagu langkahta bagi si ngena ateNa. (Masmur 119:97-100) Kalak Kristen si tuhu-tuhu ngergai ras ndalanken prinsip-prinsip Dibata labo guna dirina sendiri saja, tapi mereken kemulian man Dibata.​—Oge Matius 5:14-16.