Dibata si tuhu-tuhu kap si Nepa si nasa lit. Ia me Dibata si la ermula janah la lit kedungenna. (Masmur 90:2) Berita si meriah i bas Pustaka si Badia reh na bas Ia nari. (1 Timotius 1:11) Dibata saja si patut isembah, sabap Ia me si mereken kegeluhen man banta.​—Oge Ketangkasen 4:11.

La ise pe si pernah ngidah Dibata sabap Ia Roh, ertina bentuk kegeluhen Dibata ganjangen asangken kerina si nggeluh i doni. (Johanes 1:18; 4:24) Amin gia bage, Dibata banci nge sitandai arah tinepaNa. Contohna, arah erbage-bage buah ras bunga banci siidah maka Dibata perkeleng janah pentar jine. Doni si mbelang ras langit si meganjang ncidahken kuasaNa si mbelin.​—Oge Roma 1:20.

Alu ngoge Pustaka si Badia banci lebih sitandai Dibata ras sipat-sipatNa. Contohna, Pustaka si Badia nuriken kai si ngena ras la ngena ate Dibata, janah cara Ia erurusen ras manusia i bas erbage-bage keadan.​—Oge Masmur 103:7-10.

Amin gia melala sebutenNa, tapi gelar Dibata sada ngenca. TurikenNa ise gelarNa man banta alu ngataken, ”Aku nge Jahwe, enda me kap gelarku.” (Jesaya 42:8, Padan si Ndekah (Si Nipegendek), ibas Cakap Batak Karo, cetakan 1953). Cara mbelasken gelarNa erbage-bage bas tiap cakap. I bas cakap Karo, ibelasken ”Jahwe”. Tapi, i bas cakap sideban contohna cakap Toba ibelasken ”Jahowa”.​—Oge Masmur 83:19.

Gelar Dibata enggo isasapken i bas mbue Pustaka si Badia ras isambari alu sebuten Tuhan ntah pe Dibata. Tapi, sanga itulis, gelar Dibata lit isuratken kira-kira 7.000 kali. Sanga ngajar i doni, Jesus mpebetehken gelar Dibata alu tangkas.​—Oge Johanes 17:26.

Tontonlah video Lit kin Gelar Dibata?

Bage kel lalana kiniseran i doni enda, tuhu kin si e kerina tandana Dibata la ngkelengi kita? Nterem kalak ngatakenca kerina kiniseranta, e me percubaan si rehna i bas Dibata nari. Tapi, si enda labo tuhu.​—Oge Jakup 1:13.

Dibata ngergai manusia alu mereken kebebasen erbahan pilihen. Tentu kita ngergai kebebasen enda! (Josua 24:15) Tapi nterem jelma milih la ngikutken Dibata janah ngelakoken kejahaten man kalak sideban. Akibatna, melala jelma ngenanami kiniseran. Ceda kal pusuh Dibata ngenehen perbahanen si la adil ras kiniseran kerina jelma.​—Oge Kejadin 6:5, 6.

Jahwe e me kap Dibata si ngkelengi kita. AteNa gelah senang geluhta. Kentisik nari, isasapkenNa me kerina kiniseran ras kerina si erban ateta mesui. Tapi, ope si enda kerina terjadi, lit alasen si penting kal ngkai maka ipediat Dibata denga kiniseran e lit seh paksa genduari. Jabapenna lit i bas pelajaren 8 buku enda.​—Oge 2 Petrus 2:9; 3:7, 13.

Dibata Jahwe ngundang kita reh gelah rembak ras ia alu ngerana arah totonta. Dibata mperdiateken kita kerina sekalak-sekalak. (Masmur 65:3; 145:18) Ia ngalemi kesalahenta alu melumbar. Aminna gia mekatep kita gagal ndalanken kataNa, Dibata ngergai usahanta guna ngelakoken peratenNa. Emaka, aminna gia kita la serta, kita banci jadi teman Dibata.​—Oge Masmur 103:12-14; Jakup 4:8.

Kekelengenta kempak Dibata arus belinen asangken ku sideban, sabap Ia si mereken kegeluhen man banta. (Markus 12:30) Kekelengenta banci sicidahken alu terus erlajar ku Dibata dingen ndalanken perentah-perentahNa. Ulihna, kita banci jadi teman Dibata.​—Oge 1 Timotius 2:4; 1 Johanes 5:3.