PELAJAREN 10
Dalan si Apai nge si Nuju ku Dibata?
1. Payo nge sada dalan ngenca si itetapken Dibata?
”Metengetlah nandangi nabi-nabi perguak.”—MATIUS 7:15.
Jesus ngajarken man enterem jelma, sada dalan ntah pe sada agama si benar. Iumpamakenna bagi dalan si nuju ku kegeluhen si rasa lalap. Nina Jesus, ’Piga-piga kalak ngenca ngasup arah e erdalan’. (Matius 7:14) Dibata ngalo-ngalo kalak si nembah Ia alu cara si sue bagi siturikenNa bas Pustaka. Kerina manusia si nembah Dibata ndalani dalan si ngena ateNa.—Oge Johanes 4:23, 24; 14:6; Epesus 4:4, 5.
Tontonlah video Kerina nge Agama Benar Menurut Dibata?
2. Kai nina Jesus kerna kalak Kristen si palsu?
”Ngaku ia maka itandaina Dibata, tapi arah perbahanenna teridah labo itandaina.”—TITUS 1:16.
Jesus mpersingeti ajar-ajarna maka lit nge pagi nabi-nabi palsu si ncedai ajaren Kristen. Teridah darat nari, tempa-tempa ia nembah Dibata alu tutus. Gereja-gerejana pe ngaku Kristen. Tapi, tuhu kin pengakun kalak enda? Ja nari banci sieteh? Kalak Kristen si asli ncidahken sipat-sipat si mehuli arah perbahanenna.—Oge Matius 7:13-23.
3. Uga carandu nandai kalak si ndalanken agama si asli?
Perdiatekenndu lima tanda-tandana:
-
Kalak si ndalanken agama si asli ngergai Pustaka si Badia, sabap Pustaka si Badia e me Kata Dibata. Usahakenna nggeluh sentudu ras ajaren si lit i bas Pustaka. Agama si asli la bali ras agama-agama si erpalasken perukuren manusia. (Matius 15:7-9) Kalak si ndalanken agama si asli nggeluh sue ras kai si iajarkenna.—Oge Johanes 17:17; 2 Timotius 3:16, 17.
-
Kalak si ngikutken agama si asli ihormatina gelar Dibata, Jahwe. Nabi Daud, Musa bage pe nabi-nabi sideban nandai ras make gelar e. (Keluaren 3:15; Masmur 8:2) Jesus pe ihormatina gelar Dibata ras iberitakenna man kerina jelma. Jesus nampati melala jelma guna nandai Dibata ras ngajarken carana ertoto guna pebadiaken gelar Dibata. (Matius 6:9) I sekelewet ingandu tading, ise si mberitaken gelar Dibata?—Oge Johanes 17:26; Roma 10:13, 14.
-
Pengikut-pengikut Jesus si asli mberitaken Kinirajan Dibata. Dibata ngutus Jesus guna mberitaken berita si meriah kerna Kinirajan Dibata. Enda me sada-sadana arapen man kerina manusia. Jesus terus mberitaken berita e seh ngasa ia mate. (Lukas 4:43; 8:1; 23:42, 43) Nina Jesus, si ngikutken ia pe arus mberitaken berita e. Adi lit jelma si reh ku rumahndu mberitaken kerna Kinirajan Dibata, kai nge agamana?—Oge Matius 24:14.
-
Kalak Kristen la ngikuti doni si jahat enda. Mesukah nge nandai kalak enda sabap kalak enda la nggit ikut i bas persoalen politik ntah pe sosial. (Johanes 17:16; 18:36) Selain si e, la ia nggit ngusih perbahanen ras lagu langkah jelma si nterem si la jore.—Oge Jakup 4:4.
-
Kerina si ngikutken Jesus ncidahken kekelengan si nteguh sapih-sapih ia. Pustaka si Badia ngajarken gelah kalak si ngikutken Jesus ngergai kerina jelma aminna gia beda suku, agama ntah pe tingkat sosialna. Agama palsu mekatep ndukung peperangen bangsa-bangsa. Tapi, agama si asli la nggit ndukung peperangen. (Miha 4:1-3) Sebalikna, pengikut Jesus isumbangkenna gegeh ras waktuna alu cuma-cuma lako nampati janah ngapuli kalak sideban.—Oge Johanes 13:34, 35; 1 Johanes 4:20.
4. Banci nge itandaindu agama si benar?
Adi akapndu, agama si apai nge si ajarenna sentudu ras Pustaka si Badia? Agama si apai nge si ngergai gelar Dibata, ras si mberitaken maka Kinirajan Dibata ngenca sada-sadana arapen kerina manusia? Agama si apai si ncidahken kekelengen ras si la ndukung peperangen?—Oge 1 Johanes 3:10-12.
