PELAJAREN 13
Kai si Nandangi Terjadi kempak Agama?
1. Payo kin kerina agama mehuli?
I bas kerina agama nterem nge kalak si rate tutus nembah Dibata. Dibata mperdiateken kalak si bage rupana. Tentu saja enda berita si mehuli. Tapi sayangna, mbue kejahaten ilakoken i bas gelar agama. (2 Korinti 4:3, 4; 11:13-15) Menurut laporen, piga-piga agama terlibat i bas terorisme, pembunuhen massal, perang, bage pe penganiayan man anak-anak. Tentu ceda kal ate kalak si tutus ku Dibata megi-megi berita enda!—Oge Matius 24:3-5, 11, 12.
Agama si benar mperbadiaken gelar Dibata. Tapi, agama palsu erbahan Dibata la senang. Agama palsu ngajarken kai si la lit i bas Pustaka si Badia, termasuk ajaren si la benar kerna Dibata ras kerna kalak si enggo mate. Tapi, ate Jahwe nterem kalak meteh kebenaren kerna diriNa.—Oge Esekiel 18:4; 1 Timotius 2:3-5.
2. Kai si nandangi terjadi kempak agama?
Bujur sikataken, sabap Dibata la banci itipu kalak si ngaku ngkelengi Ia tapi situhuna ngkelengi Setan ras sikerajangenna. (Jakup 4:4) Pustaka si Badia nggelari kerina agama palsu e ”Babilon si Mbelin”. Kota Babel nai, e me kap ingan turah dingen erkembangna agama palsu kenca Banjir si Mbelin i jaman Nuah. La ndekah nari, Dibata pasti ngkernepken kerina agama palsu si enggo nipu ras nindes manusia.—Oge Ketangkasen 17:1, 2, 5, 16, 17; 18:8.
Tapi, lit berita mehuli sideban. Kerina kalak si bujur ukurna dingen tutus eragama, si lit i bas agama-agama palsu i belang-belang doni enda labo ilupaken Jahwe. Dibata narik kalak e gelah ndarat i bas agama palsu nari alu ngajarken kebenaren man bana.—Oge Miha 4:2, 5.
3. Kai si arus ilakoken kalak si bujur dingen tutus erdibata?
Agama si benar mpersadaken manusia
Dibata la ngelupaken kalak si meriah ukurna ndalanken kai si mehuli dingen benar. Dibata nuruh kalak e gelah nadingken agama palsu. Kalak si ngkelengi Dibata nggit erban perubahen guna erbahan Dibata senang.—Oge Ketangkasen 18:4.
I bas abad pemena, kalak si bujur dingen tutus nembah Dibata meriah ukurna sanga megi berita si meriah. Alu tutus ipelajarina dalan nggeluh si mbaru bas Dibata nari. Enda dalan nggeluh si mereken kemalemen ate, tujun ras arapen. Cara kalak enda ngalo-ngalo berita si meriah ras ndalanken peraten Jahwe bas kegeluhenna, banci jadi usihenta genduari.—Oge 1 Tesalonika 1:8, 9; 2:13.
Dibata Jahwe ngalo-ngalo kalak si nadingken agama palsu. Ia ngundang kalak e gelah nggabungken bana ras umat si nembah Ia. Adi alokendu undangen Dibata e, kam banci jadi temanNa, jadi bagin i bas keluarga umat si nembah Ia, ras ndatken kegeluhen si rasa lalap.—Oge Markus 10:29, 30; 2 Korinti 6:17, 18.
4. Ngkai maka kerina kalak si nggeluh i doni dungna ermeriah ukur?
Pengukumen si nandangi reh kempak agama palsu tentu sada berita si mehuli man banta. Agama palsu la nari pagi pernah mapakken ras erbahan manusia terbagi-bagi. Kerina jelma pagi ipersada nembah Dibata si tuhu-tuhu, Jahwe.—Oge Ketangkasen 18:20, 21; 21:3, 4.
