PELAJAREN 5
Kai Sura-Sura Dibata nandangi Doni Enda?
1. Kai sura-sura Dibata nepa doni?
Dibata Jahwe mereken doni enda man manusia. Doni enda me rumahta. Emaka, pasangen manusia si pemena, Adam ras Hawa, labo itepa guna nggeluh i surga. Dibata enggo nepa malekat-malekat guna tading i surga. (Jop 38:4, 7) Dibata namaken manusia si pemena i bas sada ingan si mejile ras dem alu kesenangen eme kap Peken Eden. (Kejadin 2:15-17) Jahwe mereken ia ras kesusurenna sada kesempaten guna nggeluh si rasa lalap i doni.—Oge Masmur 37:29; 115:16.
Tangtangna, Peken Eden enda denga nge ingan si keadanna mejile dingen sempurna, e me si ikataken pardis. Dibata mereken man pasangen manusia e sada perentah guna ndemi doni enda alu kesusurenna. Kenca si e ia ras kesusurenna njadiken doni enda jadi pardis. (Kejadin 1:28) Ngasa ndigan pe doni enda labo pernah ikernepken, tapi enda jadi sada ingan tading kerina manusia si rasa lalap.—Oge Masmur 104:5.
Tontonlah video Engkai maka Iban Dibata Doni Enda?
2. Engkai maka genduari doni enda la jadi pardis?
Erkiteken Adam ras Hawa la patuh man Dibata, ipelawes Dibata me ia duana bas peken e nari. Pardis dungna bene, la lit manusia si ngasup njadikenca mulihi. Nina Pustaka si Badia, ”Doni enda iberekenNa man kalak jahat.”—Jop 9:24.—Oge Kejadin 3:23, 24.
Payo kin sura-sura Dibata si ndube gagal? Lang! Sabap Ia si mada kuasa. Dibata la pernah gagal. (Jesaya 45:18) Ia pasti njadiken keadan manusia ras doni enda sentudu ras peratenNa ndube.—Oge Masmur 37:11, 34.
3. Uga carana Pardis ijadiken Dibata mulihi?
Pardis ijadiken mulihi i doni, paksa Jesus enggo merentah jadi Raja si ipilih Dibata. I bas perang Harmagedon, ipinpin Jesus malekat-malekat Dibata guna ngkernepken kerina si nentang Dibata. Emaka, igariken ras ikurung Jesus me Setan 1.000 tahun dekahna. Kerina si ngikutken Dibata selamat i bas pengkernepen e nari, sabap Jesus ngarak-ngarak ras mereken perlindungen man banta. Kerina si patuh man Dibata nggeluh si rasa lalap i doni si jadi pardis.—Oge Ketangkasen 20:1-3; 21:3, 4
4. Ndigan nge kiniseran e lanai lit?
Ndigan isasapken Dibata kejahaten i doni? Jesus mereken ”tanda” si ncidahken maka warina enggo ndeher. Adi keadan doni terus ercedana bagi si genduari, manusia banci masap. Enda buktina kita nggeluh i bas ”wari-wari pendungi”.—Oge Matius 24:3, 7-14, 21, 22.
Paksa Jesus merentah doni i surga nari, si 1.000 tahun dekahna, isasapkenna me kerina kiniseran. (Jesaya 9:6, 7; 11:9) Jesus pe nasapken kerina dosa kalak si ngkelengi Dibata. Emaka, erkelangken Jesus, isasapken Dibata kerina pinakit, ras kematen.—Oge Jesaya 25:8; 33:24.
5. Ise nge pagi si tading guna ngiani Pardis?
I Bale Kerajan banci kam jumpa ras kalak si ngkelengi Dibata janah si nggit erlajar uga carana erbahan meriah ukur Dibata
Kerina pagi kalak si ndalanken perentah Dibata nggeluh i Pardis. (1 Johanes 2:17) Jesus nuruh ajar-ajarna guna ndarami kalak si meteruk rukur ras ngajarken uga carana gelah ngena ate Dibata. Genduari, Dibata Jahwe sangana mpepulung ras ngajari jutan kalak gelah banci nggeluh i bas pardis i doni. (Sepanya 2:3) I Bale Kerajan Saksi-Saksi Jahwe, banci kita erlajar uga carana jadi perbulangen ras bapa si mehuli, bage pe uga carana jadi ndehara ras nande si mehuli. Anak-anak ras orang tua radu nembah Dibata dingen erlajar ndalanken kai si iajarken Pustaka si Badia gelah geluhna rehulina.—Oge Miha 4:1-4.
