PELAJAREN 8
Ngkai Maka Ipediat Dibata Kejahaten ras Kiniseran?
1. Uga bena-benana kejahaten lit i doni enda?
Dibata mpeturut pemerentahen manusia erdalan erabad-abad guna mbuktiken maka manusia la ngasup ndungi masalahna sendiri
Kejahaten mulai lit i doni kenca Setan erbual i Peken Eden. Tangtangna, Setan malekat si serta. Tapi, ”la pernah ikapitina si benar”. (Johanes 8:44) Atena min ia isembah, tapi situhuna Dibata ngenca banci isembah. Setan erbual kempak diberu si perlebe, Hawa, janah iajuk-ajukna gelah patuh ku ia, labo man Dibata. Adam pe ikut la patuh man Dibata. Kai akibatna? Kiniseran ras kematen!—Oge Kejadin 3:1-6, 19.
Paksa Setan ngajuk Hawa gelah la patuh man Dibata, ibenakenna sada pemberontaken ngelawan kuasa Dibata si mbelin ras kedudukenNa si Meganjang. Teremen manusia ngikutken Setan alu nulak Dibata jadi Penguasana. Emaka, Setan me si jadi ”penguasa doni enda”.—Oge Johanes 14:30; 1 Johanes 5:19.
2. Lit nge kin cacatna tinepa Dibata e?
Tinepa Dibata e sempurna kerina. Manusia ras malekat ibereken Dibata kiningasupen guna matuhi Dibata alu sempurna. (Ulangen 32:4, 5) Dibata mereken manusia kebebasen guna milih ngelakoken kai si bujur ntah pe si jahat. Enda mereken kesempaten guna nuduhken kekelengenta nandangi Dibata.—Oge Jakup 1:13-15; 1 Johanes 5:3.
3. Engkai maka ipediat Dibata kiniseran seh asa genduari?
Seh asa piga-piga waktu, ipeturut Jahwe pemberontaken ngelawan kedolatenNa. Kai alasenna? Guna mbuktikenca maka adi la Dibata si merentah, manusia la banci jore. Pemerentahen manusia si apai pe labo banci mereken kiniulin man manusia. (Pengerana 7:29; 8:9) Kenca 6.000 tahun sejarah manusia, terbukti jelas. Kerina penguasa manusia gagal, la ngasup nasapken perang, kejahaten, kinilaadilen ntah pe pinakit.—Oge Jeremia 10:23; Roma 9:17.
Sebalikna, pemerentahen Dibata mereken kiniulin man kerina manusia si patuh. (Jesaya 48:17, 18) Kentisik nari, Jahwe ngkernepken kerina pemerentahen manusia. Kalak si milih ngikutken pemerentahen Dibata ngenca si tading i doni.—Jesaya 11:9. Oge Daniel 2:44.
Tontonlah video Engkai Pediat Dibata Mesera Kegeluhen Manusia?
4. Perbahan kesabaren Dibata, kesempaten kai si lit man banta?
Setan nuduh maka la lit sekalak jelma pe si nembah Dibata erpalasken kekelengen man BaNa. Nggit nge kam mbuktiken Setan salah? Kam pasti banci. Erkiteken kesabaren Dibata, lit kesempatenta guna mbuktiken pilihenta, milih pemerentahen Dibata ntah pe pemerentahen manusia. Si apai sipilih, teridah arah caranta nggeluh.—Oge Jop 1:8-12; Kuan-kuanen 27:11.
5. Kai nge buktina kita milih Dibata jadi Penguasanta?
Pilihenta ncidahken nggit nge kita milih Dibata jadi Penguasanta ntah lang
Kita milih Dibata jadi Penguasanta alu ndarami ras ndalanken cara ersembah si benar erpalasken Kata Dibata, Pustaka si Badia. (Johanes 4:23) Bali bagi Jesus, kita banci nulak Setan jadi penguasa alu la ikut erpolitik ras perang.—Oge Johanes 17:14.
Setan make kuasana guna pembarken lagu langkah si la mehuli ras ngerugiken. Adi situlak perbahanen e, banci saja teman ntah pe kade-kadenta nentang ras megombang man banta. (1 Petrus 4:3, 4) Emaka, kita arus milih. Nggit nge kita ersada ras kalak si engkelengi Dibata? Nggit nge kita matuhi undang-undangNa? Alu bage, banci sibuktiken perguak me Setan e paksa ikatakenna maka labo lit ise pe si ngasup ndalanken perentah Dibata adi ngenanami kiniseran.—Oge 1 Korinti 6:9, 10; 15:33.
Perbahan kelengna ate Dibata nandangi manusia, pasti isasapkenNa nge pagi kejahaten ras kiniseran. Kerina kalak si tek kerna janji enda banci nggeluh si rasa lalap i doni.—Oge Johanes 3:16.
