Pelajaren kerna ajaren-ajaren dasar Pustaka si Badia erbahan kekelengenta man Dibata erbagesna. Kekelengen e perlu terus ipupuk gelah erbelinna bas pusuhta. (1 Petrus 2:2) Adi terus iusahekendu jadi teman Dibata alu erlajar Pustaka, banci datndu arapen kegeluhen si rasa lalap.​—Oge Johanes 17:3; Judas 21.

Kinitekenndu erteguhna adi pemetehndu kerna Dibata terus erlalana. Alu kiniteken e, kam banci erbahan jadi ate Dibata. (Heber 11:1, 6) Erkiteken kiniteken e, ersuruh ukurndu gelah tobat ras erbahan perubahen si merandal i bas geluhndu.​—Oge Perbahanen Rasul-Rasul 3:19.

Pasti kam nggit nuriken kerna kai si ipelajarindu man jelma si deban. Meriah ukurta mpeseh berita e. Adi terus kam erlajar Pustaka, kam banci ngasup njelasken kinitekenndu kerna Jahwe ras kerna berita si meriah arah Pustaka si Badia nari.​—Oge Roma 10:13-15.

Melala jelma si enggo nuriken berita si meriah man teman ntah pe kade-kadena. Pesehlah berita e alu mehamat ras bijak. Ula kataken agamana e salah. Turikenndu saja kerna janji-janji Dibata. Tapi si pentingna kal, jagalah lagu langkahndu sabap e lebih iergai kalak asangken kata-katandu.​—Oge 2 Timotius 2:24, 25.

Kerohaninndu banci turah, adi kam terus mpelajari Kata Dibata. Kedungenna, kam pe banci ndatken hubungen si istimewa ras Dibata. Kam jadi sikerajangenNa ras anggota keluargaNa.​—Oge 2 Korinti 6:18.

Kam banci erbahan kemajun rohani adi terus mpelajari Pustaka si Badia. (Heber 5:13, 14) Jumpai ras pindokenlah gelah banci sekalak Saksi Jahwe ngajari kam kerna Pustaka alu buku Apa yang Sebenarnya Alkitab Ajarkan? Erlalana pelajaren si idatndu arah Pustaka si Badia nari, geluhndu banci berhasil.​—Oge Masmur 1:1-3; 73:27, 28.

Berita si meriah rehna i bas Jahwe nari, Dibata si ermeriah ukur. Kam banci jadi temanNa alu erteman ras kerina kalak si nembah Ia. (Heber 10:24, 25) Adi terus kam megenggeng erbahan Jahwe senang, kegeluhen si rasa lalap nimai kam. La lit tujun si terulin asangken jadi teman Dibata!​—Oge 1 Timotius 1:11; 6:19.