Berita si mehuli rehna bas Dibata nari, Dibata si ermeriah ukur. Atena gelah keluarga-keluarga pe ermeriah ukur. (1 Timotius 1:11) Ia me si njadiken perjabun. Perjabun si resmi penting gelah keluarga ermeriah ukur ras banci jadi sada ingan si sikap guna mpebelin ras ngajar anak-anak. Kalak Kristen arus patuh man undang-undang pemerentah kerna ncatatken perjabunna, contohna cataten sipil.​—Oge Lukas 2:1, 4, 5.

Kai peraten Dibata kerna Perjabun? Ate Dibata perjabun jadi sada pengiket si nteguh dingen si rasa lalap antara dilaki ras diberu. Peraten Dibata, ndehara ras perbulangen setia bas perjabun. (Heber 13:4) Ciga kal ate Dibata kalak simulihen. (Maleaki 2:16) Tapi, Dibata banci setuju simulihen adi salah sada teman geluhna erlua-lua.​—Oge Matius 19:3-6, 9.

Jahwe njadiken dilaki ras diberu guna sisampat-sampaten bas ndalani kegeluhen. (Kejadin 2:18) Perbulangen me kepala keluarga, emaka ia si ertanggung jawab cari makan ras ngajari isi jabuna kerna Dibata. Ia aruslah perkeleng, erpengangka ras nggit erkorban man ndeharana. Bas perjabun ndehara ras perbulangen aruslah sikelengen ras siergan. Perbahan la lit perbulangen ras ndehara si serta, ia duana aruslah nggit sialem-alemen. E me sada kunci kemeriahen ukur bas perjabun.​—Oge Epesus 4:31, 32; 5:22-25, 33; 1 Petrus 3:7.

Adi lit perbeben i bas perjabunndu, tetaplah usahaken gelah kam duana sikeleng-kelengen. (1 Korinti 13:4, 5) Menurut Pustaka si Badia sirang labo dalan si mehuli guna ndungi perbeben si biasa lit bas keluarga.​—Oge 1 Korinti 7:10-13.

Ate Dibata gelahna kena ermeriah ukur. Emaka iberekenNa pedah gelah banci kena ndalani masa nguda si dem alu kemeriahen ukur. Ate Dibata kena patuh kempak orang tua, sabap pentaren nge orang tua ras lebih erpengalamen asangken kena. (Kolose 3:20) Si Nepa kita merincuh gelahna kena ndatken kesenangen i bas ndalanken si ngena ateNa.​—Oge Pengerana 11:9–12:1; Matius 19:13-15; 21:15, 16.

Kam orang tua arus nge mejingkat erdahin guna banci mereken kebutuhen pangan, ingan tanding ras uis si man paken anak-anakndu. (1 Timotius 5:8) Tapi, gelah anak-anak banci ermeriah ukur, kam orang tua perlu ngajar anak-anakndu gelah engkelengi Dibata ras erlajar man BaNa. (Epesus 6:4) Contoh si iberekendu kerna keleng man Dibata banci kena kupusuhna. Pengajaren si erpalasken Kata Dibata si iberekendu banci mereken pengaruh si mehuli man bana.​—Oge Ulangen 6:4-7; Kuan-kuanen 22:6.

Dukungen ras kata-kata pujin banci mereken semangat man ia. Anak-anak perlu penginget ras pengajaren si tegas. Alu bage, ia banci iajar ngelakoken perbahanen si mehuli gelah geluhna ermeriah ukur. (Kuan-kuanen 22:15) Tapi, ola pernah kam ngajar anak-anak alu keras dingen kejam.​—Oge Kolose 3:21.

Saksi-Saksi Jahwe nerbitken piga-piga buku si itulis khusus guna nampati orang tua bage pe anak-anak. Buku-buku enda erpalasken Pustaka si Badia.​—Oge Masmur 19:8, 12.