Mbarenda, iban Jahwe sada taman, gelarna Eden. Melala bunga, batang kayu, ras binatang-binatang bas taman e. Kenca si e, iban Dibata manusia si pertama eme Adam. Ia iban arah taneh nari, kenca si e, iembus Dibata igungna. Tehndu nge kai si terjadi? Taneh e jadi manusia si nggeluh! Itama Jahwe Adam bas taman e guna ngurussa, ras guna erban gelar man kerina binatang si lit i je.

Ibereken Jahwe sada perentah man Adam. Nina man Adam, ‘Kerina buah batang kayu si lit bas peken enda banci ipanndu, kecuali buah batang kayu si sada enda. Adi ipanndu, mate kam.’

Nce, nina Jahwe, ‘Kubanlah teman guna nampati Adam.’ IbanNa ntabeh pertunduh Adam, janah ibuatNa sada tulan rang-rangna, nce ibanNa Hawa guna jadi diberu Adam. Dungna, Adam ras Hawa me jadi keluarga si pertama. Uga perasan Adam sanga idahna Hawa? Meriah kel ukur Adam, nina, ‘Enda kepe si iban Jahwe arah tulanku nari! Gundari nggo lit si seri ras aku!’

Isuruh Jahwe me Adam ras Hawa ndemi doni alu anak-anakna. Ate Jahwe gelah radu kalak e erdahin guna erban kerina doni jadi pardis. Pardis eme ingan si mejile seri ras taman Eden. Tapi si e kerina la surung ilakoken kalak e. Engkai? Bas pasal seterusna kari sidat jawapna.