Raja si deban si merentah i Babilon eme Darius, arah Media nari. Idah Darius maka Daniel enda melala kelebihenna. Isuruhna me Daniel jadi kepala pejabat si pentingna bas negeri e. Perban si e, melala pejabat si ercian ate ras iban kalak e rencana guna mpenusur Daniel arah jabatenna. Ieteh kalak e maka lit kebiasan Daniel ertoto man Jahwe telu kali sada wari. Emaka nina kalak e man Darius, ‘O Raja, siban min aturen gelah kam saja ngenca si isembah. Adi lit si la patuh, ambekken saja ku lubang singa.’ Meriah ukur Darius megisa, nce, tanda tanganina aturen e.

Kenca ibegi Daniel kerna aturen e, mulih me ia ku rumahna, italangina jendelana, nungkuk ia, janah ertoto ia man Jahwe. Rempet masuk pejabat-pejabat si ercian ate e, idapetina Daniel sangana ertoto. Mis ilaporken kalak e man Darius, ‘Nggo ilanggar Daniel perentahndu. Ertoto ia man Dibatana telu kali sada wari.’ Keleng ate Darius man Daniel ras la ia nggit Daniel mate. Emaka, iukuri Darius carana gelah Daniel la iukum. Tapi, bas jaman e, si nggo itanda tangani raja la banci iubah. Alu terpaksa, isuruhna me pelayanna ngambekken Daniel ku lubang singa-singa si merawa.

 Bas berngi e, Darius la banci tunduh perban ngukuri Daniel. Kenca erpagi-pagi, kiam ia ngenehen uga keadan Daniel i bas lubang singa e. Erlebuh ia, ‘Ilindungi Dibatandu nge kam Daniel?’

Ijawap Daniel, ‘Lit malekat Jahwe si nutup babah singa-singa enda, emaka labo aku kaden pe.’ Meriah kel ukur raja! Mis isuruhna kalak ngangkat Daniel i bas lubang singa e nari. La lit sitik pe Daniel luka. Emaka iperentahken raja, ‘Gundari, ise si nuduh Daniel, masukken ku lubang singa e.’ Sanga kalak e iambekken, lenga pe seh teruh nggo leben iterkam singa-singa e.

Ibereken Darius me perentah man kerina rayatna, ‘Mulai gundari nari, kerina kalak arus nghamati Dibata si Daniel. Nggo iselamatkenNa Daniel arah singa-singa nari.’

Adi kam, ertoto nge kam tiap wari, bagi Daniel?