Mulihi ka kalak Juda nadingken Jahwe janah nembah man dibata-dibata si palsu. Ertahun-tahun dekahna icubaken Jahwe nampati kalak e. IsuruhNa melala nabi-nabi mpersingeti kalak e, tapi la lit si nggit mbegikenca. Itokoh-tokohi kalak e nabi-nabi si isuruh Jahwe. Kai si ilakoken Jahwe gelah ulanai isembah kalak e patung?

Nebukadnesar, eme raja Babilon, nggo italukenna bangsa si deban sada per sada. Si tangtangna italukenna eme kota Jerusalem, itangkapna Raja Joyakin, putri raja, tentera-tentera, ras tukang-tukang, janah ibabana kalak e kerina ku Babilon. Barang-barang si meherga i rumah pertoton Jahwe pe ibabana kerina. Kenca si e, ibanna Sedekia jadi raja i Juda.

Tangtangna patuh Sedekia man Nebukadnesar. Tapi bangsa-bangsa i deher kota e ras nabi-nabi palsu si lit i je mpengaruhi Sedekia gelah mberontak man Babilon. Ipersingeti Jeremia si Sedekia, nina, ‘Adi mberontak kam, pasti terjadi pembunuhen, kelihen, ras kiniseran i Juda.’

Kenca waluh tahun Sedekia merentah, mbrontak ia ngelawan Babilon. Ipindona penampat man tentera Mesir. Kenca si e, ikirim Nebukadnesar tenterana nerang Jerusalem, erkemah kalak e i sekeliling kota e. Nina Jeremia man Sedekia, ‘Nina Jahwe adi nyerah kam man Babilon, kam ras kotandu selamat. Tapi adi la kam nyerah, itutung tentera Babilon me Jerusalem ras ibabana kam ku penjara.’ Nina Sedekia, ‘La aku nggit nyerah!’

 Sada setengah tahun kenca si e, iruntuhken tentera Babilon tembok Jerusalem ras itutungna kota e. Itutung kalak e rumah pertoton ngasa keri, ibunuhna melala kalak, ras ibabana ribun kalak jadi budak.

Kiam Sedekia arah Jerusalem, tapi dungna idat kalak Babilon ia. Itangkap kalak e ia deher Jeriho janah ibabana ku Nebukadnesar. Ibunuh raja Babilon me anak-anak Sedekia i lebe-lebena. Nce, ibutaken Nebukadnesar si Sedekia ras i tamakenna ku penjara. I je me Sedekia seh asa mate. Tapi erjanji Jahwe man kalak Juda, ‘Kenca 70 tahun, Kubaba kena mulih ku rumah kena i Jerusalem.’

Kai si banci terjadi man anak muda si ikut itaban ku Babilon? Tetap nge kalak e setia man Jahwe?