PELAJAREN 60
Kerajan si Lit Rasa Lalap
Bas sada berngi, ernipi me Raja Nebukadnesar. Lanai ia banci tunduh perban nipi e. Ilebuhna tukang ramalna ras nina man kalak e, ‘Jelasken erti nipi ku e.’ Nina kalak e, ‘Kai kin nipindu e Raja, ceritaken min man kami.’ Tapi nina Nebukadnesar man kalak e, ‘Lang! Kena si arus nceritaken kai si kunipiken, adi lang kubunuh kena.’ Nina kalak e ka sekali nari, ‘Kataken man kami kai kin nipindu e, gelah banci ijelasken kami ertina.’ Nina raja, ‘Tokohi kena ate kena aku. Iyah, kataken kai si kunipiken!’ Nina kalak e ka, ‘Labo lit si ngasup ngelakoken pemindonndu e raja.’
Merawa kel Nebukadnesar janah iperentahkenna gelah kerina kalak si pentar i negeri e ibunuh. Enda pe termasuk si Daniel, Saderah, Mesah, ras Abednego. Ipindo Daniel gelah ibere raja waktu. Emaka ertoto Daniel ras telu temanna mindo penampat man Jahwe. Isampati Jahwe nge kalak e?
Icidahken Jahwe nipi Nebukadnesar man Daniel ras ijelaskenNa kai erti nipi e man bana. Kenca e, lawes Daniel njumpai pelayan raja janah nina, ‘Ula bunuh kalak si pentar e. Banci kujelasken kai kin nipi raja e.’ Ibaba pelayan e me Daniel ku Nebukadnesar. Nina Daniel man raja, ‘Nggo icidahken Dibata man bandu kai si pagi terjadi. Bas nipindu e: Idahndu lit sada patung si galang kel, takalna bas emas nari, tan ras dadana perak, awakna ras beltekna tembaga, pahana besi, janah nahena deba besi deba taneh liat. Kenca e, lit batu si megulang i datas gunung nari, janah antukna nahe patung e. Getem me patung e jadi abu ras bene ibaba angin. Tapi batu ndai dungna jadi gunung si galang, janah galangna nutupi doni.’
Nina Daniel ka, ‘Enda me erti nipindu e: Takal si iban arah emas nari nggambarken kerajanndu. Si iban arah perak eme kerajan si merentah kenca kam. Kenca e, lit me sada si bagi tembaga si merentah doni enda pagi. Lit ka pagi kerajan si megegeh bali bagi besi. Tapi dungna kerajan e terbagi jadi piga-piga bagin, lit si megegeh bali bagi besi, lit ka si medate bagi taneh liat. Batu si jadi gunung e eme Kerajan Dibata. Ihancurkenna me kerina kerajan si deban, janah kerajan e lit rasa lalap.’
Nungkuk me Nebukadnesar i lebe-lebe Daniel janah ayona seh ku taneh. Janah nina, ‘Nggo icidahken Dibatandu erti nipi e man bandu. Tuhu, la lit si seri ras Dibatandu.’ La surung ibunuhna Daniel, tapi iban Nebukadnesar ia jadi kepala kerina penasehat kerajan janah Iangkatna ia jadi penguasa propinsi Babilon. Banci nge idahndu uga Jahwe njawap toto Daniel?
“Kenca bage ipepulung kesah-kesah e raja-raja i bas sada ingan si igelari i bas cakap Heber, Harmagedon.”—Ketangkasen 16:16
