PELAJAREN 59
Empat Dilaki si Patuh man Jahwe
Sanga ibaba Nebukadnesar raja Juda ras rayatna ku Babilon, isuruhna Aspenas, sekalak pegawai istana si ngawasi kalak e. Isuruh Nebukadnesar si Aspenas ndarami anak dilaki si sehat ras si pentarna arah kalak e. Anak-anak dilaki si terpilih e ididik sedekah telu tahun. Kalak e ididik gelah banci jadi pegawai istana i Babilon. Anak-anak dilaki e iajari mbaca, nulis, ras ngerana bas bahasa kalak Babilon eme bahasa Akad. Kalak enda pe arus man pangan si ipan raja ras kerina si lit bas istana. Empat kalak arah dilaki si terpilih e, eme Daniel, Hananya, Misael, ras Asaria. Iban Aspenas ka gelar si mbaru man kalak e bas bahasa Babilon, eme Beltasar, Saderah, Mesah, ras Abednego. Ngadi nge kalak e ngelayani Jahwe perban pendidiken e?
Empat dilaki e tetap patuh man Jahwe. Ieteh kalak e maka pangan si ibereken raja la banci ipanna, perban menurut Undang-Undang Jahwe pangan e najis. Emaka, ikataken kalak e man Aspenas, ‘Ula min paksandu kami man pangan e.’ Nina Aspenas man kalak e, ‘Adi la ipanndu janah ieteh raja kam sakit, bunuh raja kari aku!’
Tapi lit ide Daniel. Nina man pengawalna, ‘Gulen-gulen ras lau inemen saja berendu man kami bas sepuluh wari enda. Kenca e, bandingkenndu kami ras si deban si man pangan raja.’ Pengawal e pe setuju man ide Daniel.
Kenca sepuluh wari, Daniel ras telu temanna sehaten asangken dilaki-dilaki si deban. Meriah kel ukur Jahwe perban kalak e patuh man baNa. Ibereken Jahwe ka man Daniel kepentaren guna ngangkai erti nipi ras petunjuk arah Dibata.
Sanga pendidiken e nggo dung, ibaba Aspenas kalak e ku Nebukadnesar. Ngerana-ngerana me raja ras kalak e janah idahna maka Daniel, Hananya, Misael, ras Asaria beluhen asangken si deban. Ipilih raja me kalak e empatna jadi pegawai istanana. Rusur isungkun raja kalak e guna ndatken nasehat bas urusen si penting. Iban Jahwe kalak e pentaren asangken kerina penasehat raja ras tukang ramalna.
Amin pe Daniel, Hananya, Misael, ras Asaria tading i kuta kalak, terus nge ingetna maka ia umat Jahwe. Terus nge ingetndu Jahwe amin gia ndauh kam arah keluargandu?
“Ola kal pelepas ise pe mapas man bandu erkiteken kam nguda denga. Tapi jadilah kam man usihen kalak si tek, subuk i bas pengeranandu, i bas lagu langkahndu, i bas kam nehken keleng ate, i bas kinitekenndu bage pe i bas ukurndu bujur.”—1 Timotius 4:12
Mungkin Menarik Ka Kapndu
PUSTAKA—GUNANA MAN BANDU
Kalak e La Nggit Nembah Patung
Saderah, Mesah, ras Abednego la nggit nembah patung emas si galang si iban Raja Babilon.
