Bas piga-piga tahun si lewat, lit me kalak Israel si tading i kota Susan, i Persia, gelarna Nehemia. Ia pelayan Raja Artasasta. Lit sekalak seninana si reh arah Juda nari si maba berita si la mehuli, nina, ‘Kalak Israel si lit i Jerusalem sangana terancam, perban tembok-tembokna si iruntuhken Babilon mbarenda lenga dung ibangun.’ Sedih kel akap Nehemia, janah isampatina atena kalak e. Ertoto ia man Jahwe gelah ibereken raja ia lawes ku Jerusalem.

Dungna, iperdiateken raja maka sedih rusur ayo si Nehemia. Isungkunna me Nehemia, ‘La pernah kuidah kam bagenda. Kena kai kam?’ Nce, nina Nehemia, ‘Banci kin la sedih aku adi kutaku sontar denga?’ Isungkun raja ka ia, ‘Jadi, uga kin atendu?’ Mis ertoto Nehemia bas ukurna. Nce, ijawabna, ‘Bereken min aku lawes ku Jerusalem gelah kubangun mulihi tembok-tembokna.’ Emaka, ibereken Raja Artasasta me si Nehemia lawes ku Jerusalem, ras iaturkenna gelah Nehemia aman i bas perdalanenna si ndauh e. Ibanna ka Nehemia jadi gubernur i Juda janah iberekenna ka kayu-kayu guna mbangun gerbang kota e.

Sanga seh Nehemia ku Jerusalem, mis ia keliling mereksa tembok-tembok Jerusalem. Ipepulungna imam-imam ras pejabat-pejabat janah nina man kalak e, ‘Parah kel cedana me. Arus mis sipekena.’ Kerina kalak e setuju, ras imulai me mbangun tembok e.

Tapi lit masalah, perban lit musuh si nokohi kalak e. Nina, ‘Biang hutan pe banci ngeruntuhken tembok si iban kena e.’ Si erdahin e la diatena kalak e ngerana, ras iteruskenna pendahin e. Tembok e pe reh ganjangna ras reh paguhna.

Iban musuh e rencana guna nerang kalak e alu rempet-rempet arah erbage ingan. Sanga ieteh kalak Jahudi rencana e, mbiar kel ia. Tapi, nina Nehemia man kalak e, ‘Ula kena mbiar. Jahwe si ras kita.’ Ibanna me penjaga-penjaga si njagai kalak si erdahin gelah musuh-musuh la banci nerang.

 Bas 52 wari saja, tembok ras gerbang kota e dung ibangun. Ibaba Nehemia me kalak Lewi ku Jerusalem guna ngeresmikenca. Ibagina kalak e jadi dua rombongen si rende. Nangkih me kalak e arah Gerbang Ulu Lau ku datas tembok e. Nce, erdalan kalak e ngkelilingi tembok e, deba ku kanan, deba ku kiri. Janah erdalan, imainkan kalak enda terompet, gendang, ras kulcapi guna rende muji Jahwe. Esra radu ras sada rombongen, janah Nehemia ras rombongen si deban. Nce, jumpa i rumah pertoton me kalak e. Kerina dilaki, diberu, ras anak-anak mereken persembahen man Jahwe guna ngerayaken acara e. Ban riahna akap kalak e, sorana seh kel megangna.