I sada negeri bagin Timur arah Israel, tading me kalak si tek man petunjuk bintang-bintang. Bas sada berngi, lit piga-piga dilaki arah negeri e si ngidah sada bintang si seh kel galangna ras seh kel terangna, nce ikutina. Bintang e pe terus erdalan i langit ku Jerusalem. Isungkuni kalak enda me kalak si tading i je, nina, ‘I ja dage anak si jadi raja kalak Jahudi pagi? Kami reh guna nghamati ia.’

Sanga si e, Herodes me raja i Jerusalem. Sanga ibegina kerna si e, mbiar kel ia. Isungkunina me imam-imam kepala, ‘I ja nge lahirna raja e?’ Nina kalak e ngaloisa, ‘Adi nina nabi-nabi, Betlehem nge ia lahir.’ Emaka, idilo Herodes dilaki-dilaki arah timur ndai, janah nina, ‘To, laweslah kena ku Betlehem, i je darami kena ia. Adi nggo jumpa kena, mulih ka kena ku jenda, kataken man bangku, perban aku pe merhat nghamati ia.’ Tapi situhuna, erbual nge ia.

Dung e, erdalan ka “bintang” ndai. Ikutken kalak e bintang ndai ku Betlehem. Ngadi me “bintang” e i datas sada rumah, nce masuk kalak e ku bas. Idah kalak e me Jesus si sangana ras Maria, mamakna. Nungkuk me kalak e i lebe-lebe anak e ras iberekenna hadiah: emas, rempah-rempah, ras minak wangi. Tapi, Jahwe nge si ngarak-ngarak kalak e njumpai Jesus? Labo.

Bas berngi e, ngerana Jahwe man Jusup i bas nipi, nina, ‘Ibunuh Herodes atena Jesus, emaka babalah Maria ras anakndu ku Mesir. Tading kena i jah seh asa aman keadanna.’ Jusup ras keluargana mis berangkat ku Mesir.

Nina Jahwe ka man dilaki-dilaki arah Timur ndai gelah ula ia mulih ku Herodes. Sanga ieteh Herodes kalak enda lanai reh, merawa kel ia. Perban la banci ietehna i ja Jesus, iperentahkenna me, ‘Bunuh kerina anak dilaki si seri umurna ras Jesus si lit i Betlehem.’ Tapi, Jesus nggo aman bas Mesir.

 Dungna, mate me Herodes. Nina Jahwe man Jusup, ‘Gundari, nggo banci kam mulih.’ Emaka, mulih me Jusup, Maria, ras Jesus ku Israel. Tading me kalak e i Nasaret.