Kenca dung Paskah, Jesus ras murid-muridna mulih ku Galilea arah Samaria nari. I deher kuta Sihar ngadi Jesus bas sada ingan si igelari sumur Jakup. Sanga ia ngadi i je, murid-muridna lawes ku kuta e nukur pangan.

Lit sekalak diberu si reh muat lau ku sumur e. Nina Jesus man diberu e, ‘Bereken aku minem.’ Nina diberu e, ‘Ngkai maka icakapindu aku? Aku me kalak Samaria. Kalak Jahudi me la sicakapen ras kalak Samaria?’ Nina Jesus ka man diberu e, ‘Adi tehndu ise kin aku, pasti ipindondu lau inemen man bangku janah kubereken me kam lau kegeluhen.’ Nce isungkun diberu e ia, ‘Kai nge maksudndu? Ingan laundu pe labo lit.’ Nina Jesus ka, ‘Ise si minem lau si kubereken e, lanai ia pernah muas.’ Emaka nina diberu e, “O Tuan, bereken min lau e man bangku.”

Kenca si e, nina Jesus man diberu e, ‘Lebuh dilakindu ku jenda.’ Nina diberu e, ‘La lit dilakiku.’ Nina Jesus ka, ‘Payo katandu e. Nggo lima kali kam erjabu, janah kalak si tading ras kam gundari labo dilakindu.’ Nina diberu e, ‘Pasti kam nabi. Nina anak kutaku banci nge kami nembah Dibata i bas gunung enda, tapi nina kalak Jahudi, bas Jerusalem ngenca banci. Tapi tek nge aku, adi nggo reh kari Mesias, pasti ajarina kami uga cara si benar nembah Dibata.’ Kenca si e, ikataken Jesus me kai si lenga pernah ikatakenna man ise pe, nina, ‘Aku kap Mesias e.’

 Kiam me diberu e ku kutana janah katakenna man kalak Samaria, nina, ‘Kuakap, nggo jumpa aku ras Mesias. Ietehna kerina soal aku. Ota sidahi ia!’ Lawes me kalak e ku sumur ndai, janah ibegikenna Jesus ngajar.

Iundang kalak Samaria me Jesus tading i kuta e. Dua wari Jesus ngajar i je, janah melala kalak si tek man bana. Nina kalak e man diberu ndai, ‘Kenca ibegi kami ia ngajar, tek kami maka ia me si nelamatken doni enda.’