Reh Jesus ku doni guna mberitaken kerna Kerajan Dibata. Ibere Jahwe kesahNa si badia man Jesus, gelah banci iban Jesus mukjizat. Enda me buktina maka sanga Jesus jadi Raja pagi, banci ibanna mukjizat si seri. Ku ja pe ia lawes, melala kalak si sakit si ndahi ia gelah ipepalemna. Penakit kai pe banci ipepalemna. Kalak si buta banci ibanna ngidah, kalak pasek banci ibanna megi, kalak si lumpuh banci ibanna erdalan, kalak si kerasuken banci sehat. Ikuit kalak e saja pe ujung baju Jesus, banci ia malem. Emaka, ikutken kalak e me Jesus ku ja pe ia lawes. La pernah ipelawes Jesus kalak e, amin pe sisada atena.

I bas sada wari, ibaba kalak me dilaki si lumpuh ku ingan Jesus ngadi. Tapi rumah e dem kel, la banci kalak e masuk. Emaka, iban kalak e lubang i datas atap, janah ipesusurna kalak si lumpuh e ku deher Jesus. Kenca e, nina Jesus man dilaki e, ‘Cinderken. To, erdalan kam.’ Sengget kel kalak e sanga dilaki e banci erdalan.

Bas wari si deban, jumpa me Jesus ras sepuluh dilaki si kena penakit kusta i sada kuta. Arah ndauh nari, ilebuh kalak e Jesus, nina, ‘Jesus, sampati kami!’ Sanga si e, kalak si kena kusta la banci ndeher ras kalak si deban. Isuruh Jesus me kalak e lawes ku rumah pertoton. Menurut Hukum Jahwe, ku je me lawes kalak si nggo malem. Sanga kalak e bas dalan denga, nggo malem penakitna. Sekalak ngenca arah si sepuluh e si mulih ndahi Jesus guna ngataken bujur man ia ras muji Dibata.

Lit ka sekalak diberu si nggo 12 tahun sakit. Latih kapna rukur perban la malem-malem. Erbuni-buni ia ngikut-ngikut Jesus bas jelma si nterem, nce ikuitna ujung baju Jesus. Mis ia malem. Sanga si e, mamang ate Jesus, nina, ‘Ise si ngkuit aku?’ Mbiar kel diberu e, tapi dungna maju ia ras ngaku ia. Tapi, labo Jesus merawa, nina, ‘Labo dalih, Nakku.’

Lit ka sekalak pejabat, gelarna Jairus. Mindo ia, ‘Reh min kam ku rumahku! Parah kel sakit anakku.’ Tapi ope lenga seh Jesus i rumah Jairus, nggo mate anakna e. Sanga seh ia bas rumah e, nggo melala kalak si ngandung. Nina Jesus man kalak e, ‘Ula kena ngandung. Tunduh saja nge ia.’ Nce, itagangna tan anak e, nina, ‘Nakku, medakken!’ Keke me anak e. Isuruh Jesus gelah ibere man anak e. Menurutndu, uga nge riahna akap orang tuana?