Kira-kira bulan April bas tahun 30 M, Jesus lawes ku Jerusalem. Melala kalak si reh ku kota e guna ngerayaken Paskah. Bas perayan e, ibere kalak e binatang jadi persembahen ku rumah pertoton. Lit si mbaba binatang arah kutana, deba itukurna i Jerusalem.

Sanga Jesus reh ku rumah pertoton, idahna kalak si erbinaga binatang i je. Ingan si arusna ipake guna nembah Jahwe iban kalak e jadi ingan erbinaga! Sanga ngidah si e, kai si ilakoken Jesus? Ibanna sada cambuk arah nali nari janah ipelawesna kerina binatang si lit bas rumah pertoton e. Ibulakkenna meja-meja ingan nukarken sen janah iamburkenna kerina sen e. Nina Jesus man kalak si erbinaga merpati, ‘Baba kerina barangndu e! Ula bandu rumah Bapakku jadi ingan erbinaga!’

Sengget kel kalak si lit i je sanga idahna kai si ilakoken Jesus e. Kejadin e pasti erban murid-muridna nginget sada nubuat kerna Mesias, ‘Keleng kel ateku nandangi rumah Jahwe.’

Kenca si e, bas tahun 33 M, ipelawes Jesus ka si erbinaga i bas rumah pertoton. Segat atena kalak si la ngergai rumah Bapakna.