PELAJAREN 80
Ipilih Jesus Sepuluh Dua Rasulna
Kenca Jesus erberita, kira-kira sada setengah tahun, arus ipilihna ise si erdahin ras ia. Ise nge si iajarina jadi peminpin bas runggun Kristen? Ope lenga milih kalak e, ipindo Jesus gelah isampati Jahwe ia. Emaka, nangkih ia ku datas gunung, ertoto ia i je segedang berngi. Sanga nggo terang, ilebuhna murid-muridna ras ipilihna 12 rasulna. Tehndu nge ise saja gelarna? Gelar kalak e eme, Petrus, Andreas, Jakup, Johanes, Pilipus, Bartolomeus, Tomas, Matius, Jakup anak Alpeus, Tadius, Simon, ras Judas Iskariot.
Ku ja pe Jesus lawes, si Sepuluh Dua kalak e tetap ikut. Kenca nggo iajari Jesus, isuruhna kalak e lawes erberita. Ibereken Jahwe kalak enda kuasa gelah banci ipelawesna roh jahat ras ipepalemna si sakit.
Tek kel Jesus man kalak enda, nggo bagi temanna akapna. Akap kalak Parisi rasul-rasul e labo lit sekolahna, kalak si biasa-biasa saja nge. Tapi, nggo iajari Jesus gelah beluh kalak e bas ngelakoken tugasna. Kalak enda me pagi si nemani Jesus ope lenga ia mate ras kenca ia ipekeke. Sepuluh Dua rasul e pe arah Galilea nari, seri bagi Jesus. Lit ka si nggo erjabu.
Rasul-rasul enda labo sempurna, banci kalak e erban salah. Mon-mon, la iukurina kai si ikatakenna ras si ilakokenna. Mon-mon kurang sabar kalak e. Pernah ka kalak e rubat kerna ise si pentingna. Tapi, situhuna kalak enda mehuli nge, janah keleng atena Jahwe. Kalak enda me si minpin ras njaga runggun kalak Kristen kenca Jesus lawes.
“Kugelari kam teman-temanku sabap man bandu enggo kupeseh kerina si enggo kubegi i bas Bapangku nari.”—Johanes 15:15