Segat kel ate kalak Parisi man Jesus, emaka idaramina cara guna nangkap Jesus. Nina kalak e, la banci mpepalem kalak si sakit bas wari Sabat. Sanga wari Sabat, jumpa Jesus ras sekalak si buta i bas dalan. Nina man murid-muridna, ‘Idahndu me kari uga Dibata mpepalem dilaki e.’ Icampurken Jesus cidurna ras abu nce ileketkenna ku mata dilaki e. Nina Jesus man dilaki e, ‘To, cuci matandu i kolam Siloam.’ Ilakoken dilaki e me kai si isuruh Jesus. Dungna banci me ia ngidah.

Sengget kel kalak ngidah si e. Nina kalak e, ‘La kin kam nge si rusur kundul janah mindo-mindo, ntah mirip saja nge kam ras ia?’ Nina dilaki e, ‘Payo, aku kalakna!’ Isungkuni kalak e ia, ‘Engkai maka nggo banci kam ngidah?’ Dung iceritakenna man kalak e, mis ibaba kalak e ia ku kalak Parisi.

Nina dilaki e man kalak Parisi e, ‘Lit si itamaken Jesus ku mataku nce isuruhna kucuci. Kenca kuban bage, nggo banci aku ngidah.’ Nina kalak Parisi e ka, ‘Adi bas wari Sabat kam ipepalemna, labo mungkin Dibata erban kam malem.’ Tapi nina kalak si lit i je, ‘Adi la arah Dibata nari, engkai maka banci ia malem.’

Idilo kalak Parisi me orang tua dilaki e janah isungkunna, ‘Engkai maka anakndu nggo banci ngidah?’ Mbiar kel orang tuana e, perban ieteh kalak e maka ise pe si tek man Jesus pasti iambekken arah rumah pertoton nari. Emaka nina ngaloisa, ‘La teh kami. Sungkun min ia.’ Terus isungkuni kalak Parisi dilaki e. Dungna nina, ‘Ma nggo kukataken ndai. Engkai maka terus isungkunndu?’ Merawa kel kalak Parisi e janah isorongkenna ia.

Reh ka Jesus ndahi dilaki e ras isungkunna ia, ‘Tek nge kam man Mesias?’ Nina dilaki e, ‘Adi kutandai pasti tek aku.’ Nina Jesus, ‘Aku kap Mesias e.’ Mehuli kel Jesus me? Labo penakitna saja si ipepalemna, tapi iban Jesus ka ia tek man Dibata.