Jesus banci mpepalem penakit ras mpekeke kalak si mate. Tapi selain si e, banci ka ikuasaina angin ras udan. Kenca ia dung ertoto i datas gunung, itatapna ku teruh, ku Lau Galilea. Idahna me badai si galang i teruh. Rasul-rasulna nggo latih kel akapna njagai kapal gelah ula gedap. Nusur me Jesus, nce erdalan ia i datas lau ku kapal e. Sanga idah rasul-rasul lit kalak si erdalan i datas lau, mbiar kel kalak e. Tapi nina Jesus man kalak e, ‘Ula kena mbiar. Aku ngenda.’

Nina Petrus, ‘Adi kam kin e, Tuan, suruh min aku reh ku jena.’ Nina Jesus man Petrus, ‘Mari reh kam.’ Emaka, i bas badai si galang e, ndarat me Petrus arah kapal nari janah erdalan ia i datas lau ndahi Jesus. Tapi sanga nggo ndeher ku Jesus, inen Petrus me badai e, dungna reh biarna. Emaka mulai me masuk nahena ku lau. Serko me Petrus, ‘Tolong aku Tuan!’ Itangkap Jesus me tanna janah nina, ‘Engkai maka kam sangsi? Engkai maka la kam tek?’

Jesus ras Petrus nangkih ku kapal ras badai e pe mis ngadi. Ngidah kejadin si luar biasa e, ikataken rasul-rasul e me man Jesus, ‘Tuhu-tuhu kel kam Anak Dibata!’

Labo enda saja ngenca bukti kuasa Jesus nandangi cuaca. Bas sada wari, Jesus ras rasul-rasulna erkapal ku sebrang lau. Jesus sangana tunduh bas bagin belakang kapal e. Nce, rempet-rempet reh angin si meter. Kapal e pe ientam ombak ras lau pe masuken ku kapal. Imedaki rasul-rasul me Jesus, nina, ‘Guru, mate me kita! Uga siban e!’ Medak me Jesus janah nina man lau e, ‘Sinikken!’ Angin ras lau e pe mis tenang mulihi. Nce, nina Jesus man rasul-rasulna, ‘Engkai maka la kam tek?’ Emaka erkusik-kusik kalak e, ‘Ihh, angin ras lawit pe patuh man bana.’ Gundari nggo ieteh rasul-rasul maka adi tuhu-tuhu tek kalak e man Jesus la lit si man kebiaren.