Kenca Jesus ibaptis, ibaba kesah si badia me ia ku padang gurun. Nggo 40 wari dekahna ia la man kai pe, emaka melihe kel ia. Nce, reh me Setan ndahi Jesus janah nina man Jesus, ‘Adi tuhu kin kam Anak Dibata, ban dage batu enda jadi roti.’ Tapi ijawab Jesus alu ayat si lit bas Pustaka, ‘Lit kap tertulis, labo arah roti saja manusia nggeluh. Tapi arah kai si ikataken Jahwe.’

Dung e, nina Setan ka man Jesus, ‘Adi tuhu kin kam Anak Dibata, dabuhken bandu arah datas rumah pertoton nari. Sebap lit tertulis, ikirim Dibata nge malekatna nelamatken kam.’ Tapi ijawab Jesus ka alu ayat Pustaka, ‘Lit kap tertulis, ula iujindu Jahwe.’

Kenca si e, icidahken Setan ka man Jesus kerina kebayaken ras kemulian si lit bas kerajan doni enda. Nce nina, ‘Adi nggit kam nembah aku, kubereken kerina kebayaken ras kemulian enda.’ Tapi nina Jesus, ‘Laweslah Setan! Lit kap tertulis, Jahwe ngenca si arus isembah.’

Dungna lawes me Setan, janah reh me malekat-malekat mereken pangan man Jesus. Kenca e, lawes me Jesus mberitaken berita si meriah kerna Kerajan. Enda me tujunna reh ku doni. Meriah kel ukur kalak megiken berita si ibaba Jesus e, janah nggit kalak e ngikutken ia ku ja pe ia lawes.