PELAJAREN 74
Jesus Jadi Mesias
Erberita Johanes, nina, ‘Reh me sekalak si ulin asangken aku.’ Sanga umur Jesus kira-kira 30 tahun, lawes ia arah Galilea nari ku Lau Jordan, ingan Johanes mbaptis kalak. Ipindo Jesus man Johanes, gelah ibaptis ia. Tapi nina Johanes, ‘Labo aku si mbaptis kam. Kam nge si arus mbaptis aku.’ Nina Jesus ka, ‘Jahwe kap si nuruh kam mbaptis aku.’ Emaka, masuk kalak e ku Lau Jordan janah ibaptis Johanes me Jesus.
Kenca Jesus ndarat bas lau nari, ertoto ia. Sanga si e, terbuka me langit janah kesah Dibata nusur bagi merpati. Kenca si e, ngerana Jahwe i surga nari, “Kam me anakKu si Kukelengi. Kam me si ngena ateKu.”
Kenca kesah si badia Jahwe nusur ku Jesus, i je me ia jadi Kristus, ntah pe Mesias. Gundari, nggo banci imulaina dahin si ibereken Jahwe man bana i doni.
Dung Jesus ibaptis, lawes me ia ku padang gurun, tading me ia i je 40 wari dekahna. Sanga ia mulih je nari, idahina Johanes. Sanga idah Johanes nggo reh Jesus, nina, ‘Enda me Anak Biri-biri Dibata si ngapus dosa arah doni enda pagi.’ Alu kata-kata e, ipeseh Johanes man kalak maka Jesus me Mesias e. Tehndu nge kai si terjadi man Jesus sanga ia i padang gurun? Mari sinen.
“Terbegi pe sora i Surga nari, ‘Kam kap anakKu si Kukelengi, kam kap si ngena
ateKu.’”—Markus 1:11
Mungkin Menarik Ka Kapndu
JESUS KAP DALAN, KEBENAREN, RAS KEGELUHEN
Jesus Iperidiken
Engkai maka Jesus arus iperidiken Johanes adi labo ia erdosa?
PENUNGKUNEN SI IJAWAP PUSTAKA
Kai Maksudna Iperidiken?
Bas Pustaka si Badia lit iceritaken piga-piga kalak si iperidiken bas lau. Enda banci nampati kita ngangkai kai ertina iperidiken ras engkai maka perlu iperidiken.
