Rasul-Rasul nggo mulih arah perdalanen erberita. Lanai ndekah seh me wari Paskah bas tahun 32 M. Latih kel akap kalak e, emaka ibaba Jesus kalak e naik kapal ku Betsaida, gelah istirahat i je. Tapi sanga kapalna e seh, kepeken nterem kalak si ngikutken ia nggo nimai i je. Amin pe istirahat ate Jesus ras rasul-rasulna, tetap nge ialo-alona kalak e alu mehuli. Ipepalemna si sakit ras iajarina kalak e. Erpagi-pagi nari seh asa ben, iajarken Jesus kerna Kerajan Dibata man kalak e. Sanga ben wari, nina rasul-rasul man Jesus, ‘Pasti nggo melihe kel kalak e. Suruh min kalak e mulih gelah man ia lebe.’

Nina Jesus, ‘Ula suruhndu kalak e mulih. Berelah kalak e man.’ Nce isungkun rasul-rasul ka, ‘Tukur kami saja roti man kalak e?’ Reh nina rasul Pilipus, ‘Amin pe lit senta nukursa, i ja sidarami roti man kalak si bagenda teremna.’

Isungkun Jesus, ‘Asa kai nari kin buena panganta?’ Nina Andreas, ‘Lima roti ras dua ikan ngenca. Me labo bias.’ Nina Jesus ka, ‘Baba ku jenda roti ras ikan e.’ Isuruhna me kalak si lit i je kundul erkelompok-kelompok, lit si 50 kalak sada kelompok, lit ka si 100 kalak. Ibuat Jesus roti ras ikan ndai, tatapna ku langit, nce ertoto ia. Kenca si e, iberekenna pangan ndai man rasul-rasul, janah kalak enda me si mbagikenca. Lit 5.000 dilaki bage pe diberu ras anak-anak si lit i je, man seh asa besur. Dung e, ipepulung rasul-rasul me kerina si sisa. Lit 12 keranjang si sisa! Luar biasa kel me!

Meriah kel ukur kalak e, janah ibanna atena Jesus jadi rajana. Tapi ieteh Jesus maka lenga seh waktuna iban Jahwe ia jadi raja. Emaka, isuruhna jelma si nterem e mulih. Ia ras rasul-rasulna pe lawes ku daerah i sebrang Lau Galilea. Murid-muridna nangkih ku kapal, tapi Jesus lawes nangkih ku gunung. Erkai? Ertoto atena man Bapakna. Amin pe sibuk kel ia, Jesus la pernah lupa ertoto.