Ibaba imam-imam kepala me Jesus ku ingan Gubernur Pilatus. Isungkun Pilatus kalak e, ‘Kai tuduhen kena man ia?’ Nina kalak e, ‘Katakenna ia raja!’ Isungkun Pilatus me Jesus, ‘Tuhu nge kam Raja kalak Jahudi?’ Nina Jesus, ‘Kerajanku labo i bas doni enda nari asalna.’

Kenca e, ikirim Pilatus me Jesus ku penguasa Galilea, eme Herodes, gelah ipereksana ka. Herodes pe la lit datna salah Jesus, maka ikirimkenna ka mulihi Jesus ku Pilatus. Dungna, nina Pilatus man kalak e, ‘Aku ras Herodes nggo mereksa ia tapi la lit dat kami kesalahenna. Emaka, kubebasken ia.’ Serko me kalak si lit i je, nina, ‘Bunuh ia! Bunuh ia!’ Jesus pe iligasi prajurit-prajurit, nce iciduri, janah ipekpeki. Itamaken kalak e mahkota arah duri nari ku takal Jesus, nce itokohi kalak e ia, ‘Mejuah-juah, Raja Jahudi.’ Sekali nari, ikataken Pilatus man kalak e, ‘La lit kudat si salah bas ia.’ Tapi kalak enda terus ngataken, ‘Pakuken ia bas tiang!’ Dungna, ipediat Pilatus me kalak e ngukum Jesus.

Ibaba kalak e me Jesus ku sada ingan si igelari Golgota. I je me Jesus ipakuken ku sada tiang, nce tiang e ipecinder. Ertoto me Jesus, ‘Bapak, ampunilah kalak e. La ietehna kai si ilakokenna.’ Itokohi kalak e Jesus, nina, ‘Adi tuhu kin kam Anak Dibata, nusur dage kam arah tiang e! Selamatkan bandu.’

Lit sada penjahat si ipakuken i samping Jesus. Nina man Jesus, ‘Inget min aku sanga kam reh pagi jadi Raja.’ Jesus pe erjanji, ‘Ras aku me kam pagi i Pardis.’ Kenca ben wari, gelap me kerina negeri e telu jam dekahna. Lit piga-piga murid Jesus cinder i deher tiang e, termasuk Maria nande Jesus. Nina Jesus man Johanes gelah iurusna Maria bagi nandena.

Dungna, nina Jesus me, “Nggo dung!” Tungkukkenna takalna, nce mate me ia. Sanga si e, terjadi gempa bumi si megegeh. I bas rumah pertoton pe, nggo terbelah dua horden si misahken Ruang si Badia ras Ruang si Badiana kel. Lit sekalak prajurit si ngataken, ‘Tuhu-tuhu kel ia Anak Dibata!’