Piga-piga waktu kenca Jesus njumpai rasul-rasul, ngulihi ka Petrus njala nurung i Lawit Galilea. Ia lawes ras Tomas, Jakup, Johanes ras piga-piga murid si deban. Nggo sada berngi kalak e njala nurung tapi kai pe la datna.

Kenca terang, arah ndauh nari idahna lit sekalak dilaki si cinder i duru pantai. Arah ndauh nari isungkunna si njala nurung e, ‘Lit nge dat kena nurung?’ Ijawap kalak e, ‘La lit!’ Nce nina dilaki e, ‘Tamaken jalandu ku sebelah kanan kapal.’ Kenca ikutken kalak e, melala kel datna nurung. Ban buena, lanai tertarik kalak e jalana ku kapal. Emaka nina Johanes, ‘Tuan kap ah!’ Petrus pe mis lompat ku lau janah erlangi ia ku pantai, murid-murid si deban pe ngikutken ia alu kapal.

Sanga kalak e seh i pantai, idahna nggo lit nurung ras roti si sangana itasakken. Ipindo Jesus ikan sidat kalak e guna nambahi pangan si nggo lit i je. Nce, nina Jesus, ‘Mari kita man.’

Kenca kalak e dung man, isungkun Jesus me Petrus. ‘Apai atendu kelengen, aku ntah dahinndu?’ Nina Petrus, ‘Pasti kamlah Tuan.’ Nina Jesus ka, ‘Adi bage, bere manlah anak-anak dombaku.’ Nce, isungkun Jesus ka, ‘Petrus, keleng nge atendu aku?’ Ijawap Petrus, ‘Uelah, Tuan. Kam pe tehndu nge.’ Nina Jesus, ‘Uruslah anak-anak dombaku.’ Lit telu kali isungkun Jesus bage. Sedih ukur Petrus megisa. Nina Petrus me, ‘Itehndu nge kerinana. Tehndu nge keleng ateku kam.’ Nina Jesus me, ‘Bere man anak-anak dombaku.’ Nce, ikatakenna ka, ‘Teruslah ikutken aku.’