Sanga Jesus ras rasul-rasulna i datas tingkat denga, nina man kalak e, ‘Pasti itadingken kena aku berngi enda.’ Nina Petrus, ‘Adi aku labo! Amin pe itadingken kalak enda kam, adi aku labo mungkin.’ Tapi, nina Jesus man Petrus, ‘Ope tekuak manuk, nggo telu kali katakenndu maka la itandaindu aku.’

Sanga Jesus ibaba ku rumah Kayapas, menam kerina rasul-rasul kiam. Tapi, lit dua kalak si ngikuti rombongen e. Salah sadana eme Petrus. Lawes ia ku halamen rumah Kayapas, janah cudu ia i je. Perban terang i je, idah sekalak pelayan diberu me Petrus, nce nina, ‘Eh, la kin kam si rusur ras Jesus?’

Nina Petrus: ‘Lo ka! La kap kuangka si katakenndu e!’ Nce, lawes ia ku gerbang. Tapi, la ndekah kenca si e, lit ka pelayan diberu si deban si ngidah ia, janah katakenna man si lit i je, ‘O, nake, ia kap si rusur ras Jesus!’ Nina Petrus ka, ‘Ih, ise kin Jesus e!’ Nce, lit dilaki si ngataken, ‘Ue, kueteh nge kam pe temanna! Pengeranandu pe bagi kalak Galilea, seri ras Jesus.’ Tapi ersumpah Petrus, nina, ‘Tuhu, la kutandai ise ia!’

Sanga si e, tekuak me manuk. Idah Petrus itatap Jesus ia arah datas. Inget Petrus me mulihi kata-kata Jesus, nce lawes ia janah nderkuh ia.

Sanga si e, lit sekelompok kalak si ngadili bas kalak Jahudi si sangana pulung guna ngadili Jesus bas rumah Kayapas. Gelarna Sanhedrin. Ibunuh kalak e atena Jesus, emaka daramina salahna. Tapi la lit idatna kesalahen Jesus. Dungna, isungkun Kayapas me Jesus, ‘Tuhu nge kam Anak Dibata?’ Nina Jesus, ‘Tuhu.’ Nce, mis ikataken Kayapas, ‘Lanai bo kita perlu bukti si deban. Nggo jelas me, igombangina Dibata!’ Kerina si bas pengadilen e setuju, janah nina, ‘Arus ia mate.’ Iparapi kalak e Jesus, icidurina, itutupna matana, ras ipekpeki kalak e ia, nce nina kalak e, ‘Adi tuhu kin kam nabi, ise dage si mekpek kam?’

Sanga wari nandangi ciger, ibaba kalak e me Jesus ku ruang pengadilen Sanhedrin, nce isungkun kalak e ia mulihi, ‘Tuhu nge kam Anak Dibata?’ Nina Jesus njawabsa, ‘Bagi katandu ena me.’ Emaka, iputusken kalak e me maka Jesus nggo ersalah perban nggombangi Dibata, janah ibaba kalak e ia ku Pontius Pilatus, Gubernur Roma. Kai si terjadi selanjutna? Mari sinen.