Saul lahir i Tarsus janah ia terdaftar jadi kalak Roma. Situhuna ia kalak Parisi, si beluh bas undang-undang kalak Jahudi. Segat kel atena man kalak Kristen. Nggo rusur ia reh ku rumah-rumah kalak Kristen guna nangkap ras namaken kalak e ku penjara. Ia pe ikut nonton sanga Stepanus ibenteri kalak alu batu seh asa mate.

Tapi la kapna puas adi kalak Kristen si i Jerusalem ngenca si itangkapna. Ipindona ijin man imam si mbelin gelah banci itangkapna kalak Kristen i Damaskus. Sanga nandangi seh i kuta e, rempet lit cahaya si terang kel nerangi ia, emaka ndabuh ia. Kenca si e, lit sada sora si ngerana, ‘Saul ngkai maka iserangndu aku?’ Isungkun Saul, ‘Ise kin kam?’ Nina sora e, ‘Aku kap Jesus. Laweslah ku Damaskus, gelah tehndu kai si arus ilakokenndu.’ I bas wari e, buta me Saul janah arus lit si negu-negusa ku kota.

I Damaskus, lit kalak Kristen si setia, gelarna Ananias. Sanga si e, Ananias pe banci mbegi Jesus ngerana. Nina Jesus man bana, ‘Laweslah kam ku rumah Judas si lit i dalan si i gelari dalan Lurus, daramilah Saul i je.’ Nina Ananias, ‘Tuan, kutandai kel kalakna si ikatakenndu e! Me ia kin kalak si nangkap murid-muridndu?’ Tapi, nina Jesus, ‘To jumpai saja ia. Nggo kupilih ia erberita ku erbage bangsa.’

Emaka ijumpai Ananias me Saul, nce nina, ‘Eh, Saul, mejuah-juah, Senina. Jesus si nuruh aku nambari matandu.’ Sanga si e, Saul pe banci ngidah mulihi. Ipelajarina kerna Jesus janah dungna ia pe jadi pengikutna. Kenca ibaptis ras jadi kalak Kristen, Saul mis erberita i rumah pertoton, radu ras turang seninana si kalak Kristen. Menurutndu, uga nge perasan kalak Jahudi ngidah Saul ngajar kerna Jesus? Pasti sengget kel kalak e, emaka nina, ‘La kin ia nge sange si ngayak-ngayak pengikut Jesus?’

Lit telu tahun dekahna Saul erberita man kalak Damaskus. Segat kel ate kalak Jahudi man Saul, emaka iban kalak e rencana guna munuh Saul. Tapi, ieteh turang seninana e kerna rencana e, nce ibunikenna Saul. Masuk Saul ku sada keranjang, nce ipenusur ia arah lubang si lit i tembok kota.

Sanga Saul ku Jerusalem, merhat ia jumpa ras turang seninana si lit i je. Tapi kalak e mbiar denga man Saul. Lit sekalak Kristen si mehuli, gelarna Barnabas. Ibabana Saul man rasul-rasul janah ijelaskenna maka Saul nggo robah, dungna kalak e pe tek. Saul pe erberita alu semangat radu ras perpulungen si lit i Jerusalem. Bas pudi wari, ia itandai alu gelar Paulus.