Jahwe erjanji, ‘Lanai pagi lit si tangis, ceda ate, si mesui, ntah pe kematen. Kuhapus me pagi kerina iluh si mambur arah mata kalak e. Kerina si la mehuli pasti ilupaken pagi.’

Itama Jahwe si Adam ras Hawa bas taman Eden gelah kalak e nggeluh alu dame ras senang. Arusna kalak e patuh man Bapakna si i surga janah ndemi doni alu keturunenna. Tapi Adam ras Hawa la patuh man Jahwe. Amin pe bage, kai si ate Dibata ilakokenNa lenga berubah. Bas buku enda nggo sipelajari maka kerina peraten Dibata pasti terjadi. KerajanNa me pagi si mereken kerina pasu-pasu si mehulina i doni, bagi si ijanjikenNa man Abraham.

Kentisik nari, Setan ras malekat-malekatna si jahat, bage pe kerina kalak jahat masap me. Kerina pagi ngelayani Jahwe. Kita lanai banci sakit ntah pe mate. Tapi sigejapken me pagi, reh sehatna kita janah reh riahna ukurta tiap medak erpagi-pagi. Doni enda pe jadi pardis pagi. Kerina kalak banci ndatken pangan si sehat ras rumah si aman. Kerina kalak mehuli, lanai lit si ngelukai ntah pe kasar. Binatang-binatang lanai mbiar man kita, kita pe lanai mbiar man ia.

Pasti meriah kel ukurta sanga ipekeke Jahwe kalak si nggo mate. Banci ka kita jumpa mulihi ras kalak si nggo mate, bagi Abil, Nuah, Abraham, Sara, Musa, Rut, Ester, ras Daud. Radu me kita pagi ras kalak e erban doni enda jadi pardis. Melala pagi dahin si erban kita senang.

Ate Jahwe kam pe ikut tading i je. I je, pemetehndu kerna Jahwe pasti reh buena tiap wari. Emaka, teruslah reh deherna ras Jahwe tiap wari, gundari nari seh rasa lalap!